UVIÉU, 20 Sep. (EUROPA PRESS) -
CC.OO. d'Industria solicitó esti vienres que, al traviés del Ministeriu d'Industria, Comerciu y Turismu, se cree una mesa industrial na que participen los responsables de Vesuvius Ibérica Refractarios y na que puedan debatise y analizar les alternatives qu'existen pa evitar el pieslle de la planta de Llangréu (Asturies) y de Miranda de Ebro (Burgos).
La sede del Ministeriu, en Madrid, acoyó una xunta ente'l director Xeneral d'Industria de, Galo Gutiérrez Monzonís, representantes de CC.OO. d'Industria y del comité d'empresa de Vesuvius.
El grupu Vesuvius rexistró'l 12 de setiembre un espediente de regulación d'empléu qu'afecta a los dos centros mentaos y que va suponer el cese de l'actividá manufacturera. La empresa alega razones organizativas y estructurales.
Según CC.OO. d'Industria, la Dirección Xeneral d'Industria compartió la opinión del sindicatu y treslladáron-yos que nun taben dispuestos a perder esti tipu d'industria. Afirmen que dende'l Ministeriu comprometiéronse a falar cola empresa y, lo más ceo, intentar la creación d'esa mesa.
La organización califica de "positivu" l'alcuentru y señaló que'l Ministeriu caltúvose "mui receptivu". CC.OO. d'Industria treslladó la so opinión y esmolición respecto al ERE planteáu, porque considera que ye una "deslocalización mazcarada".
Coles mesmes, treslladáron-y que l'ERE planteáu "nun se xustifica de nenguna de les maneres, porque amás de nun tener nengún problema económicu, la empresa cunta con un productu n'espansión y tien un altu valor añedíu".
