Damián Barreiro publica 'Asturianía kitsch', obra ganadora del Fuertes Acevedo na qu'analiza los iconos asturianos

IMPRONTA EDITORIAL.

UVIÉU 6 Jul. (EUROPA PRESS) -

El periodista d'Europa Press Damián Barreiro acaba de publicar con Impronta la obra ganadora de la XXVII edición del premiu Máximu Fuertes Acevedo d'ensayu del Principáu: 'Asturianía kitsch: decálogu de la cultura pop ástur', onde analiza los iconos de la cultura asturiana.

Nel so momentu, el xuráu destacó que'l trabayu de Barreiro "analiza la cultura asturiana moderna dende una perspectiva novedosa, percorriendo los sos iconos con datos nuevos sobre temes y personalidaes que'l públicu va reconocer y va sentir como propios". Amás, el fallu resalta "l'amenidá y l'interés" del testu.

Damián Barreiro Maceiras (1984) ye llicenciáu en Periodismu pola Universidá del País Vascu (UPV), máster en Xestión Cultural pola Universidá Oberta de Catalunya (UOC) y especialista universitariu n'Asturies. Espaciu, Patrimoniu, Historia y Cultura pola Universidá d'Uviéu.

Enantes, foi ganador del Premiu Máximu Fuertes Acevedo nel 2014 y 2018 con 'Caleya Sésamu: el papel de la televisión na tresmisión interxeneracional de la llingua' y 'Asturploitation', amás d'otros premios d'investigación con ensayos sobre llingua asturiana y cultura audiovisual.

Trabayó nes redacciones d'Asturies.com y 'Les Noticies' y collaboró con medios como la RTPA, onde foi guionista de programes divulgativos sobre lliteratura, música y historia d'Asturies. Actualmente trabaya na redacción d'Europa Press Asturias. Amás ye responsable de la canal de Youtube 'Horros & Frixuelos', onde analiza les conexones ente la cultura asturiana y la cultura pop contemporánea.