Decreten prisión sin fianza pal alcalde d'Alaucín y pal arquitectu

Reuters

VÉLEZ-MÁLAGA (MÁLAGA), 3 de Marzu (EUROPA PRESS)

La titular del Xulgáu d'Instrucción númberu 3 de Vélez (Málaga), Irene Urbón, qu'investiga'l denomináu casu 'Arcos', decretó esta nueche prisión sin fianza pal hasta agora alcalde de la población malagueña d'Alaucín, José Manuel Martín Alba, y pal arquitectu José Mora Lampérez, según informaron fontes xudiciales.

Al alcalde, que lu detuvieron el pasáu vienres xunto con otres 12 persones nel marcu d'esta operación contra la corrupción urbanística, se-y atribúin los delitos de sobornu, blanquéu de capitales prevaricación, prevaricación urbanística y falsedá documental, según precisaron a Europa Press les mesmes fontes.

Martín Alba, que llegó pa declarar ante la instructora del casu sobre les 16.00 hores ente aplausos d'una trentena de vecinos que taben nes puertes de les dependencies xudiciales, firmó la so renuncia al acta de conceyal, que va presentase mañana nel Rexistru del Ayuntamientu, según indicaron fontes socialistes.

Pela so parte, la xueza decretó tamién prisión pa ún de los xefes de serviciu del Árera d'Arquitectura de la Diputación, José Mora, que declaró pela mañana y al que se-y atribúin de primeres los delitos de sobornu, falsedá documental y prevaricación urbanística.

Tanto l'alcalde como l'arquitectu abandonaron los xulgaos sobre les 22.30 hores caún nun coche de la Guardia Civil. Unes 80 persones esperaben la salida y glayaron frases d'ánimu pa dambos. Dende la defensa del arquitectu aseguraron que "nun hai motivos" pa la midida tomada, que ye "innecesaria dafechu", polo que van recurrir la resolución, al tiempu qu'añadieron que los fechos "nun son de gravedá, de lo que pue deducise".

De la mesma manera, tamién declararon güei l'apareyador municipal F.L., que quedó en llibertá sin fianza, acusáu d'un delitu de prevaricación urbanística. Respeuto del asesor P.J.G., que tamién declaró esta mañana, la instructora decretó llibertá provisional sin fianza y prohibición de salar d'España, tando acusáu polos supuestos delitos de tráficu de d'influencies y contra la ordenación del territoriu.

La xuez qu'investiga'l casu 'Arcos' dexó ayeri en llibertá a les seis persones a les que tomó declaración. Dos d'elles quedaron sin midíes preventives, pero acusaes, en concreto, por blanquéu, nel casu d'una de les fíes del alcalde, y por sobornu, blanquéu y contra la ordenación del territoriu, nel casu de V.LL., fía d'ún de los empresarios.

Los otros cuatro deteníos tuvieron que declarar güei de nuevo pa que-yos comunicaren l'importe de la fianza, anque ayeri quedaron en llibertá provisional. D'esta manera, la xueza impunxo fiances de 120.000 euros pa los empresarios F.Ll.O., J.M.R.A. y M.T.T., y de 30.000 euros pa L.E.C.M. Los cuatro, sobre los que la xuez acordó la midida preventiva de prohibición de salir d'España, tienen diez díes hábiles p'abonar la fianza.

Per otru llau, la otra fía del alcalde, la fía d'ún de los empresarios deteníos y la secretaria del arquitectu yá quedaron en llibertá con cargos demientres el fin de selmana pola Guardia Civil, que desarrolló'l pasáu vienres esta operación cola participación de la Fiscalía Especial contra la corrupción y la de Mediu Ambiente y Urbanismu, que se saldó con 13 persones arrestaes.