Denunciantes d'abusos sexuales de sacerdotes cuando yeren neños piden reunise col Papa

Reuters

LA VALETTA, 12 d'Abril (Reuters/EP)

Diez ciudadanos malteses que supuestamente sufrieron abusos sexuales per parte de sacerdotes cuando yeren neños, y qu'algamaren llevar a xuiciu a trés cures por estes acusaciones, van pidir una audiencia privada col Papa Benedicto XVI na visita que'l pontífiz va realizar a la isla esta selmana.

"Lo que pidimos ye poder reunimos col Papa pa que mos ayude a encarnar les nueses feríes y superar el nuesu trauma" afirmó Lawrence Grech, voceru de los diez denunciantes, nuna rueda de prensa. Dende 1970 acreditáronse en Malta 45 casos de pederastia nos que taben implicaos sacerdotes católicos.

Grech afirmó que les víctimes, que vivíen nuna residencia pa neños al cargu de la Ilesia católica cuando los supuestos abusos tuvieron llugar, busquen xusticia, non una compensación económica.

Pel momentu, los damnificaos recibieron respuesta del arzobispu de Malta, Paul Cremona, que s'ofreció a recibilos.

La denuncia d'estos diez homes formulóse nel 2003, anque tovía nun s'emitió nenguna sentencia. Sicasí, los sacerdotes acusaos quedaron separaos de les sos obligaciones pastorales.

D'otru llau, dellos cartelos qu'anunciaben en dellos puntos de la isla la próxima visita del Papa sufrieron ataques de desconocíos, qu'escribieron enriba mensaxes ofensivos relacionando a la Ilesia cola pedofilia.

La xerarquía eclesiástica maltesa afirmó esti llunes nun comunicáu qu'once años dempués de crear un equipu de 'respuesta especial' pa tratar esti tipu d'asuntos había constancia de 45 casos d'abusos a menores, de los cuales 19 yeren infundaos.

Según la curia maltesa, 13 de los casos tienen alguna base, mientres qu'otros 13 tán tovía pendientes de demostrar. "La Ilesia tómase bien en serio estos casos... Pa la Ilesia, hasta un solu casu ye demasiao", podía lleese nel comunicáu.