La Fabriquina inaugura la so colección d'ensayu con 'Diarios d'una panderetera', de Leticia Baselgas

LA FABRIQUINA.

UVIÉU 29 Nov. (EUROPA PRESS) -

La editorial La Fabriquina va inaugurar esti mes d'avientu la so colección d'ensayu nueva, 'Manifiestu', con 'Diarios d'una panderetera', de Leticia Baselgas. Nesta obra, l'autora reflexona sobre los procesos de reproducción y recuperación de la tradición.

'Diarios d'una panderetera' recueye les reflexones de l'autora, referente de la pandereta asturiana y mitá del dúu L-R, sobre tradición, identidá y autenticidá. Trátase d'unos diarios personales escritos a lo llargo de más dos décades dende les sos primeres esperiencies nun grupu de baille folclóricu hasta la llegada de la llibertá creativa al traviés del conceptu de post-folk.

La colección 'Manifiestu' inspírase na mítica 'Colección Popular Asturiana' d'Ayalga Ediciones y busca recoyer, al traviés de temátiques variaes, el pensamientu actual asturianu nun formatu breve y accesible.

La presentación de 'Diarios d'una panderetera' va ser el xueves 5 d'avientu en Xixón, a les 19.00 hores nel bar-tienda El Arca, en Cimavilla y cola presencia de l'autora, Leticia Baselgas, el prologuista de la obra, David Guardado, y la consultora de xéneru y musicóloga Laura Viñuela.

Per otru llau, n'Uviéu la presentación va ser el vienres 13 d'avientu, a les 19.00 hores, na Llibrería Matadero Uno y cola presencia de l'autora, Leticia Baselgas, el prologuista de la obra, David Guardado, y la llibrera Natalia González Menéndez.