El festival Aquasella, l'eventu que más derechos d'autor xeneró nel 2011

REUTERS

UVIÉU, 28 de Xunu (EUROPA PRESS)

El festival de música electrónica de Les Arriondes, Aquasella, ye l'eventu cultural que más derechos d'autor xeneró n'Asturies a lo llargo del 2011, según reflexa'l balance del añu ellaboráu pola Sociedá Xeneral d'Autores y Editores (SGAE).

Polo xeneral, l'añu pasáu los sectores del ociu y la cultura acusaron de manera "más sensible" la crisis económica, según la SGAE. Ello ye que'l descensu d'ingresos por venta de discos y películes ofrez cifres "mui negatives", igual que la copia privada. Amás, n'Asturies, constátase tamién la incidencia de la crisis na hostelería y dexen de percibise ingresos de la Televisión del Principáu d'Asturies (TPA).

No referente a la organización d'actividaes culturales, el sector priváu asume un "importante" protagonismu. Nesti sen, la sociedá sorrayó'l papel del Aquasella y d'otros espectáculos como Maná, 'Forever: King of Pop', Volare 2011 y David Bisbal.

Tamién les artes escéniques tuvieron un "bon comportamientu". Los más rentables fueron 'La del manojo de rosas', 'Los hombres no mienten', 'Hoy no me puedo levantar', 'La chulapona' y 'Garrick'.

Asina, la xestión directa d'eventos escénicos (música moderna y sinfónica; teatru y danza) n'Asturies supón 705.500 euros, creciendo un 3,34 por cientu al respecto de la temporada precedente.

ESTABILIDÁ NES CIFRES

La xestión llocal de la SGAE n'Asturies zarró'l pasáu exerciciu con una subida nos sos ingresos del 1,24 por cientu. El númberu d'afiliaos a la entidá nesta Comunidá algamó, nel 2011, los 1.491 socios, una subida de 5 puntos, al respecto de los 1.420 del añu anterior.

La cifra alministrada llocalmente pola SGAE n'Asturies quedó nel 2011, en 3,1 millones d'euros. La xestión centralizada relativa a esta Comunidá, per otra parte, aporta otros 3,7 millones d'euros (un 11,24% menos que l'añu precedente).

N'ESPAÑA

A nivel estatal, el balance de SGAE nel 2011 ofrez un resultáu negativu de 4,6 millones d'euros (antes d'impuestos) de resultes del saneamientu de tolo relativo a la Sociedá Dixital d'Autores y Editores (sDae).

Amás, la institución viose obligada a la reformulación de les cuentes del 2010, qu'ofrecieron unes perdes de 13,5 millones d'euros (orixinalmente, antes de l'auditoría, almitiérase una perda de 6,3 millones).

La previsión pal 2012 ye llograr l'equilibriu presupuestariu de perdes y ganancies, calteniendo'l porcentaxe del descuentu d'alministración y la reducción de les prescripciones, por cuenta de un rigorosu control de los gastos de xestión y la moderación nes inversiones.