La Guardia Civil suma cinco nueves identidaes a la so llista de supuestos terroristes más buscaos

Guardia Civil

MADRID, 26 de Febreru (EUROPA PRESS)

El Serviciu d'Información de la Guardia Civil sumó cinco nuevos nomes a la so llista de terroristes d'ETA más buscaos y güei fueron incorporaos cola so correspondiente semeya a la páxina web del Institutu Armáu. Trátase d'Aitzol Iriondo, supuestu llugarteniente del xefe de los comandos, Garikoitz Aspiazu, del posible miembru del Comandu Vizcaya Jurden Maritegi, de la pareya sentimental formada por Egurne Salterain y Oroitz Aldekoa, y d'Eider Uruburu Zabaleta, informaron a Europa Press fontes de la llucha antiterrorista.

Aitzol Iriondo Yarza (San Sebastián, 1978) procede, como la mayor parte de terroristes de la so xeneración, de la 'kale borroka'. Tres ascender gradualmente na organización ta considerán na actualidá como ún de los principales responsables del aparatu militar d'ETA xunto a Garikoitz Aspiazu Rubina 'Txeroki', y Francisco Javier López Peña 'Thiery'.

Delles fontes apunten a que pue ser el tercer etarra que fuxó tres l'asesinatu de los guardies civiles Raúl Centeno y Fernando Trapero, el pasáu 1 d'avientu na población francesa de Capbreton, pero la inconsistencia de los testimonios visuales recoyíos y la falta de resultaos concluyentes d'ADN resten credibilidá a esta sospecha. Iriondo foi identificáu pola Ertzaintza al atopase un pelu dél nel coche bomba que nun llegó a españar colocáu frente a la Delegación del Ministeriu de Defensa en Logroño y desactiváu polos Tedax de Policía'l 10 de setiembre del 2007.

COLLABORADORES DE LUPIAÑEZ.

Les fuercies y Cuerpos de Seguridá del Estáu buscaben tamién dende'l 6 d'avientu a Agurne Salterain Albisua y Oritz Aldekoa-Otalora Iturriagaetxebaria, en paraderu desconocíu dende la detención del miembru 'lliberáu' d'ETA Gorka Lupiáñez Mintegi'l pasáu 6 d'avinetu en Berriz (Vizcaya) y del que les identidaes fueron adelantaes a princpios de xineru por Europa Press.

La pareya ocupara una vivienda xunto a Lupiáñez mientres ésti tentaba de montar una infraestructura de 'zulos', armes y collaboradores nel País Vascu pa que fuera utilizada polos comandos de la organización terrorista. Cuatro díes dempués de la detención de Lupiáñez, los axente rexistraron un caseríu en Mendata y una vivienda y el so trasteru n'Abadiño. Les muestres recoyíes nesta última pol Llaboratoriu de Criminalística del Institutu Armáu permitieron conocer la identidá de los dos 'laguntzailes', de los que se sospecha que pudieron cruzar ya la frontera con Francia tentando d'engrosar les files de 'lliberaos' de la organizción terrorista.

COMANDU VIZCAYA.

Pela so parte, Jurdan Martitegi Lizaso ye, xunto con Arkaitz Goikoetxea, el presuntu autor de delles aiciones terroristes cometíes por ETA nos últimos meses en Vizcaya y Guipúzcoa, ente ellos l'atentáu trampa perpetráu por ETA nel Xulgáu de Getxo (Vizcaya) el 11 de payares del 2007, que causó firíes de gravedá a un ertzaina cuando manipulaba'l detonador d'un de los dos artefactos colocaos pola banda.

Natural de Durango (Vizcaya) y de 27 años d'edá, Martitegi ta fugáu dende hai aproximadamente un añu y foi deteníu pola Ertzaintza con anterioridá en dos ocasiones. La primera en 1997 por participación en desordes públicos y la segunda nel 2000 pol ataque a una sucursal bancaria de Galdakao. De la mesma manera, a esti presuntu activista, de casi dos metros d'altuda y unos 85 kilos de pesu, vincúlaselu con abondos actos de 'kale borroka' y col incendiu d'un concesionariu d'automóviles en Iurreta, en xineru del 2000.

Finalmente, Eider Uruburu Zabaleta foi condenáu a un añu de cárcel por cantar conseñes en favor d'ETA, pero se desconocen más datos dientro de la so supuesta trayectoria na banda, anque les Fuercies de Seguridá otórguen-y un papel relevante nesti momentu.