El Ministeriu de Cultura inclúi pela primer vez l'asturianu nos sos alcuentros ente escritores y traductores

Archivo -
EDICIONES TRABE. - Archivo
Publicado: martes, 24 agosto 2021 16:40

UVIÉU, 24 Ago. (EUROPA PRESS) -

Delles llibreríes asturianes van acoyer nos meses de setiembre y d'ochobre alcuentros ente escritores y traductores dientro del programa 'Afinidaes electivas', qu'entama la Dirección Xeneral del Llibru y Fomentu de la Llectura del Ministeriu de Cultura y Deporte. El programa inclúi pela primer vez la lliteratura n'asturianu.

La iniciativa, qu'anguaño celebra la so segunda edición, consiste en charles lliteraries ente dos escritores y traductores que desenvuelvan el so trabayu nes distintes llingües del Estáu, animando a caún d'ellos a referise al trabayu y a la obra del otru, buscando semeyances, conexones, y mesmo caminos diverxentes.

El programa tien como oxetivu impulsar l'actividá en llibreríes independientes, amás d'apoyar la creación lliteraria en toles llingües propies del Estáu. D'esta forma, pon en valor la pluralidá llingüística d'España, favoreciendo'l diálogu y contribuyendo al espardimientu de lliteratures de distintos territorios.

Nel programa participen autores en castellanu, catalán, gallegu, euskera, asturianu, valencianu y aragonés. La diversidá tamién ta presente al traviés de los xéneros lliterarios nos que trabayen: narrativa, poesía, ilustración y traducción.

El Ministeriu de Cultura y Deporte llanzó a finales de xunu esta segunda edición del programa, anque la mayoría d'alcuentros van celebrase a lo llargo de los meses de setiembre y ochobre.

En total, participen 64 llibreríes de 13 comunidaes autónomes: Andalucía, Aragón, Asturies, Cantabria, Castiella-La Mancha, Castiella y Llión, Cataluña, Euskadi, Galicia, Isles Baleares, La Rioxa, Madrid y Comunidá Valenciana.

El nome del programa, 'Afinidaes Electivas', inspírase na obra homónima de Goethe, onde se defende que "namás se pue entender lo ayeno al entender aquello colo que yes allegao".

Asturianu ofrecido por