Asturies va tener una presencia destacada na Feria del Llibru de Frankfurt 2022
UVIÉU, 7 8EUROPA PRESS)
La lliteratura n'asturianu y gallego-asturianu va tener presencia nes campañes de fomentu y promoción de la llectura qu'entame'l Ministeriu de Cultura. Amás, les lletres asturianes va ser les protagonistes d'una actividá dientro de la Feria del Llibru de Frankfurt 2022.
España va ser país convidáu d'honor de la feria y, a propuesta del Principáu, la lliteratura n'asturianu va tener una actividá propia dientro del programa oficial. Asina lo alcordaron la conseyera de Cultura, Política Llingüística y Turismu, Berta Piñán, y la directora xeneral del Llibru y Fomentu de la Llectura, María José Gálvez, nuna xunta celebrada esti martes na sede del Ministeriu de Cultura y Deporte.
Acompañada pol director xeneral de Política Llingüística, Antón García, Piñán treslladó a Gálvez la necesidá de dar visibilidá a la creación n'asturianu y gallego-asturianu, incluyéndola nes campañes de fomentu a la llectura que ponga en marcha'l Ministeriu que dirixe José Manuel Uribes y nes actividaes de promoción.
Asina, amás de tener una presencia destacada na Feria del Llibru de Frankfurt, tamién s'alcordó la participación de los escritores en llingua asturiana y gallego-asturianu en dos programes propios de la Dirección Xeneral del Llibru: los Alcuentros lliterarios n'IES, destinaos a fomentar la llectura ente l'alumnáu de Secundaria, y los alcuentros d'autores en llibreríes, nel marcu del programa Afinidades electivas.
Los alcuentros lliterarios n'institutos y centros públicos onde s'imparte Enseñanza Secundaria Obligatoria (ESO) tienen como oxetivu desenvolver el vezu de llectura. Nesti ciclu, que va fomentar la movilidá de los creadores asturianos y l'espardimientu de la so obra, un autor o autora, escoyíu pol institutu, va falar sobre'l so trabayu y el so procesu creativu y, depués, va caltener un diálogu con estudiantes. Primero, l'alumnáu va preparar l'actividá cola llectura del material escoyío y consensuao col profesoráu del centru.
PARTICIPACIÓN EN CAMPAÑES Y BIBLIOTEQUES
Per otru llau, nel contestu del programa Afinidades electivas, la lliteratura asturiana va tener presencia n'actividaes pa impulsar la programación de llibreríes independientes y apoyar la creación lliteraria, destacando la pluralidá llingüística d'España, favoreciendo'l diálogu ente distintes llingües y contribuyendo al espardimientu d'obres de distintos territorios.
Esta iniciativa consiste na organización d'alcuentros en llibreríes independientes ente dos escritores y traductores, que tienen que falar del trabayu y obra del otru, buscando semeyances, conexones y mesmos caminos diverxentes.
A la inclusión de la lliteratura escrita n'asturianu y en gallego-asturianu nos programes ministeriales, va añadise tamién la so participación nos Alcuentros de Verines que cada añu se celebren en Pendueles (Llanes), en collaboración cola Universidá de Salamanca.
Coles mesmes, la Dirección Xeneral del Llibru encargada de la protección y impulsu de la creación lliteraria y la llectura, comprometese a integrar l'asturianu nes sos campañes de promoción.
Gálvez, responsable tamién del desarrollu de les biblioteques y el fomentu de la igualdá nel accesu a esti serviciu públicu, informó a la Conseyera de Cultura sobro la inclusión de les obres publicaes n'asturianu y gallego-asturianu nel catálogu de les biblioteques del Estáu.
