Muerre Bubba Smith, l'actor que facía de Hightower en 'Loca Academia de la policía'

WARNER BROS.

LOS ÁNXELES, 4 d'Agostu (EUROPA PRESS)

Bubba Smith, ex xugador de fútbol americanu qu'algamó fama mundial encarnando al axente Hightower na saga humorística 'Loca Academia de Policía' apaeció muertu na so casa de Los Ánxeles.

Les causes del fallecimientu del actor, que tenía 66 años, nun se concretaron oficialmente, anque too indica que Charres Aaron Smith morrió por causes naturales. El so cuerpu sin vida alcontrólu'l so axente na so casa de Baldwin Hills.

La carrera de Bubba Smith como estrella del fútbol americano entamó nel equipu de la Universidá de Míchigan, onde lu escoyeron meyor xugador de la so lliga en dos ocasiones. Pasó a profesional en 1967, nel equipu de los Colts de Baltimore. Ellí, trés años dempués, ganó l'aniellu de campeón de la Super Bowl.

En poniendo puntu y final a la so carrera deportiva empezó la so trayectoria nel mundu del espectáculu, onde'l so imponente físicu, más de dos metros d'altor, abrió-y munches puertes. Asina, tuvo papeles espóradicos en series como 'Las Nuevas Aventuras de Wonder Woman', 'Los Ángeles de Charlie' o 'Hart to Hart'.

Pero la fama mundial llegó-y de la mano del axente Moses Hightower na saga 'Loca Academia de Policía', papel qu'encarnó la primer vez en 1984, y que repitiría en seis ocasiones, la última en 1989, con 'Loca academia de policía 6: Ciudad sitiada'.

Depués, siguió con apaiciones fugaces en series conocíes como 'MacGyver', 'Cosas de casa' o 'Matrimonio con hijos'. El so últimu trabayu nel cine data del pasáu 2010. Trátase de la cinta d'horror independiente 'Blood River' escrita y dirixida por Shedrack Anderson III.