El Muséu del Pueblu d'Asturies acueye la esposición 'Cartelos n'asturianu (1976-2000)'

   XIXÓN, 25 Mar. (EUROPA PRESS) -

   La conceyala de Cultura, Museos y Industries Creatives del Conceyu de Xixón, Montserrat López Moro, inauguró esti miércoles la esposición 'Cartelos n'asturianu (1976-2000)', de la colección de la Fundación Belenos y que foi donada al Muséu del Pueblu d'Asturies.

   Según una nota de prensa de la Fundación Municipal de Cultura (FMC), la Fundación Belenos nació en 1983 col fin d'estudiar, caltener y espublizar la cultura asturiana en toles sos manifestaciones, cuantimás el patrimoniu tradicional y célticu.

   Precisamente, una de les sos xeres foi la d'arrexuntar cartelos escritos n'asturianu, o qu'anuncien actividaes de promoción de la cultura asturiana.

   Mientres más de cuarenta años, formaron una colección de 1.983 cartelos (1976 - 2021), que güei día sirve de testimoniu imprescindible, según la FMC, pa conocer el movimientu de reivindicación de la llingua asturiana, que surde na Transición Democrática con Conceyu Bable y el lema ¡Bable nes escueles!.

   Los cartelos pertenecen a munchos ámbitos de la sociedá. Los más numberosos tán vinculaos a la música, les fiestes y les nueches celtes, la política, l'ecoloxismu, y la defensa y espardimientu del asturianu. Munchos d'estos cartelos, obres efímeres, solo caltiénense nesta colección.

   La colección Belenos ye tamién una amuesa del cartelismu asturianu nesti periodu, nel que conviven una estética basada en motivos del arte popular, célticu y prehistóricu con un diseñu bien contemporaneu.

   Los autores son ilustradores profesionales y artistes, asina como dibuxantes aficionaos y militantes d'esti movimientu de defensa de la llingua asturiana. Pa esta esposición, escoyóse una selección de los cartelos más antiguos donaos pola Fundación Belenos al muséu nel 2023.