El Principáu anicia'l procesu pa declarar la cultura del acebache bien d'interés cultural inmaterial

EUROPA PRESS.

UVIÉU, 26 Ene. (EUROPA PRESS) -

La Conseyería de Cultura, Política Llingüística y Turismu principió'l procesu pa que la cultura del acebache sía bien d'interés cultural (BIC) de calter inmaterial.

El procesu va durar un máximu de dos años y precisa d'informes de l'Academia de la Historia, la Universidá d'Uviéu y el Real Institutu d'Estudios Asturianos (Ridea). Depués, va ser el plenu del Conseyu de Patrimoniu l'encargáu d'aprobar definitivamente la protección patrimonial, nel casu de que los dictames sían favorables.

El Boletín Oficial del Principáu (Bopa) publica esti xueves la resolución pola que s'incoa l'espediente que va permitir otorgar protección patrimonial a esta industria artesana pola so relevancia cultural y social dende hai sieglos, especialmente na zona de Les Mariñes, en Villaviciosa.

La cultura del acebache ta vinculada al Camín de Santiago dende'l medievu. La ruta xacobea contribuyó al desenvolvimientu de l'artesanía y la talla del mineral per toa Europa. La relevancia de l'actividá acebachera en Compostela ta mui acreditada, al igual que les sos conexones colos artesanos asturianos, porque'l Principáu tenía'l xacimientu más cercanu del mineral.

La existencia d'un xacimientu d'acebache d'escepcional calidá n'Asturies permitió, yá dende époques remotes, la so esplotación minera y el so aprovechamientu artesanal, polo que surdió una cultura basada nes cualidaes d'esti singular mineral.

Esta trayectoria histórica y artística identificóse con un área xeográfica determinada, Les Mariñes de Villaviciosa y la so contorna, onde pervivió la tradición minera hasta hai un par de décades y na que se concentra'l númberu mayor d'artesanos qu'entá siguen vinculaos al acebache.

L'oficiu d'acebacheru, güei amenorgáu en númberu, ellabora y comercializa básicamente dos tipos de productos: pieces tradicionales de les que xeneren una gran producción --por exemplu, cigües que se vienden mayoritariamente al mercáu compostelanu y asturianu--, y pieces de xoyería que salen de talleres nos que se define un estilu propiu, trabayando'l diseñu y una ellaboración distintiva y innovadora, nuna llinia qu'incorpora materiales nuevos. Dambes tienen puxu y mercáu.