El Principáu recupera la retresmisión televisiva de la Vuelta Ciclista Asturies tres de siete años

   UVIÉU, 12 Mar. (EUROPA PRESS) -

   El Gobiernu d'Asturies anunció esti xueves el so apueste por recuperar la retresmisión televisiva de la Vuelta Ciclista Asturies, que volverá emitise en directu na Televisión del Principáu d'Asturies (TPA) dempués de siete años. D'esta forma, la centenaria ronda va tornar a les pantalles per primer vegada dende 2019.

   La vicepresidenta del Principáu, Gimena Llamedo, axuntóse esti xueves cola directora de la carrera, Cristina Mendo, pa concretar los detalles d'esta decisión y coordinar la retresmisión televisiva de les etapes.

   Pa financiar la emisión, l'Executivu autonómicu va invertir casi 210.000 euros, que se sumen a l'aportación que se realiza dende Turismu Asturies, qu'anguaño algama los 62.500, lo que supón una medría del 30% dende 2023.

   Al términu del alcuentru, la vicepresidenta destacó la importancia de recuperar la cobertoria televisiva de la prueba: "La Vuelta Ciclista Asturies ye una cita histórica del deporte asturiano y la so retresmisión en directu supón un pasu importante pa reforzar la so visibilidá y proyección. Queremos qu'esta cita, que forma parte del nuestru patrimoniu deportivu dende va un sieglu, vuelva llegar a tolos llares y contribuya tamién a amosar Asturies al esterior", amestó.

   Coles inscripciones entá abiertes, la ronda yá cunta con 16 equipos confirmaos y va caltener les cuatro etapes de la pasada edición, que foi la del so centenariu. La emisión televisiva va dexar, amás, amosar los paisaxes y conceyos pelos que pasa la carrera, lo que refuerza la promoción del Principáu como destín deportivu y turísticu.