UVIÉU 9 Jun. (EUROPA PRESS) -
El Conceyu d'Illas, a instancies d'un informe de la Conseyería de Mediu Rural y Cohesión Territorial, refugó responder les alegaciones a un espediente urbanísticu d'un vecín d'esti conceyu por tar escrites n'asturianu.
Un vecín de La Peral (Illas) solicitó autorización al so Conceyu pa cambiar una puerta y les ventanes de la so casa. Más tarde, presentó les alegaciones correspondientes con un testu de dos fueyes escrites n'asturianu.
Sicasí, un documentu firmáu por un arquitectu de la Conseyería de Mediu Rural y Cohesión Territorial, al que tuvo accesu Europa Press, diz qu'esti idioma nun ye oficial, polo que'l Conceyu tien que solicitar al interesáu presentar el escritu en castellanu pa poder da-y respuesta.
Nesi sentíu, el Conceyu d'Illas treslladó al vecín la solicitú y pidió-y subsanar la situación nun plazu de diez díes. L'informe ta firmáu pol alcalde, Fernado Alberto Tirador Martínez, d'IX.
La Llei d'Usu, nel so artículu cuatro, establez que tolos ciudadanos tienen derecho a emplear l'asturianu y a espresase nél, "de palabra y per escrito", amás de que va tenese por válidu "a tolos efectos" l'usu d'esti idioma nes comunicaciones orales o escrites de la ciudadanía col Principáu.