"El procesu nunca s'abrió", afirma la XDLA sobre l'Estatutu, de la qu'acusa a Barbón y a la FSA d'aplazar la reforma

UVIÉU 5 Abr. (EUROPA PRESS) -

La Xunta pola Defensa de la Llingua Asturiana (XDLA) recordó esti martes que la reforma del Estatutu p'aprobar la oficialidá "nunca s'abrió", polo qu'afirmen que nun se pue falar de "fracasu del procesu". Nesi sentíu, acusaron al presidente Adrián Barbón y a la FSA "d'allargar el periodu de carencia de los derechos llingüísticos de les persones que falen asturianu y gallego-asturianu".

Esti miércoles, na Xunta Xeneral va debatise una Proposición Non de Llei (PNL) de Podemos pa instar al Principáu a rexistrar una propuesta de reforma del Estatutu que recueya la oficialidá. La XDLA, al traviés de nota de prensa, recordó que la movilización social a favor de la oficialidá contrastó con "un periodu políticu marcáu pol aplazamientu indefiníu de la reforma estatutaria". Por eso, afirmen que nun se pue falar de fracasu del procesu de reforma "porque'l procesu nunca s'abrió".

"Muncho menos se pue falar de fracasu colectivu. En tou casu, podríemos falar de si les negociaciones p'abrir esi procesu foron de bona fe por toles fuercies polítiques qu'intervinieron o si polo que se taba aguardando yera por atopar la forma d'escenificar la ruptura", pregúntense dende la XDLA, que recuerden que pa saber si existen 27 diputaos favorables a la oficialidá tien qu'haber una votación.

"Eso namás pue facelo posible'l Conseyu de Gobiernu, llevando a la Xunta Xeneral una propuesta de Llei de reforma del Estatutu d'Autonomía d'Asturies. Hai qu'emponderar la proposición non de llei que se va presentar agora na Xunta Xeneral porque ye un intentu de dignificar el debate y ponelu nel sitiu onde finalmente se va tener que producir", diz l'asociación.

Nesi sentíu, apunten a la "responsabilidá" de la FSA y del presidente Barbón "d'allargar el periodu de carencia de los derechos llingüísticos de les persones que falen asturianu y gallego-asturianu, en contra del so programa electoral". Una situación que, afirmen, supón "un retrocesu na calidá democrática" que "da ales a que se siga diendo contra los consensos científicos afitaos cuantayá".

"Pone-y fin a la situación de desigualdá en derechos ye un mandáu del electoráu que votó mayoritariamente a partíos que prometieron nel so programa trabayar p'aprobar la oficialidá nesta llexislatura", sentencien dende la XDLA.