El programa del Día d'Asturies 2025, homenaxe pa la cultura sidrera asturiana

UVIÉU, 27 Ago. (EUROPA PRESS) -

El Gobiernu del Principáu d'Asturies va celebrar nos conceyos qu'integren la Contorna de la Sidra, del 5 al 8 de setiembre, los actos conmemorativos del Día d'Asturies, qu'anguaño rinden homenaxe a la cultura sidrera, tres de la so reconocencia como Patrimoniu Cultural Inmaterial de la Humanidá pola Unesco.

La conseyera de Cultura, Vanessa Gutiérrez, el director xeneral de Retu Demográficu, Marcos Niño y l'alcalde de Villaviciosa, Alejandro Vega, acompañaos de los alcaldes de Bimenes, Cabranes, Colunga, Nava y Sariegu, presentaron esti miércoles el programa d'actividaes de baldre que va acoyer caún de los conceyos anfitriones.

La Contorna de la Sidra ta integrada per seis conceyos del centru-oriente asturianu, Bimenes, Cabranes, Colunga, Nava, Sariegu y Villaviciosa, que comparten un denominador común, la producción sidrera. La celebración d'esta emblemática festividá na contorna supón asina un homenaxe a la recién declaración de la cultura sidrera asturiana como Patrimoniu Mundial.

Amás de la sidra, la música, la cultura y la tradición protagonicen una completa programación que va combinar mercaos tradicionales, amueses de gastronomía, exhibiciones de deportes y xuegos autóctonos, actividaes infantiles y espectáculos de cai. El patrimoniu históricu y natural de la contorna tamién va tener un papel protagonista, con visites guiaes, talleres y propuestes pa tolos públicos, nun programa pensáu pa disfrutar en familia y abiertu a residentes y visitantes.

La conseyera de Cultura destacó "que'l Día d'Asturies ye la gran fiesta d'alcuentru de les y los asturianos: conmemoramos lo que somos y lo que proyectamos al mundu. Amás, anguaño facémoslo poniendo en valor la cultura sidrera y la collaboración ente conceyos, como yá ocurrió l'añu pasáu cola celebración conxunta nos tres conceyos de Los Ozcos".

Nesti sentíu añadió "qu'esti modelu itinerante y compartíu refuerza la cohesión territorial: cada conceyu apurre la so personalidá y, xuntos, texemos una programación abierta a families, residentes y visitantes que disfruten de les nuestres tradiciones, el nuestru patrimoniu y la nuestra música".

El Día d'Asturies volverá ser, d'esta forma, una gran fiesta d'alcuentru alredor de les nuestres tradiciones, cola cultura sidrera como símbolu y nexu común.

En Sariegu, el 5 de setiembre, el programa va arrancar con una exhibición de deporte tradicional en Vega y el pasucais al cargu de la Bandina L'Emboláu. En Narzana, el públicu va disfrutar de les visites teatralizaes y actuaciones musicales d'Amaia Rey y del Coru Errante na Cueva de San Pedrin. Tamién van poder visitase'l Llagar Trabanco y la Yeguada Finca Maeza y va haber espicha con degustación de productos típicos. Cierra les actividaes en Sariegu'l conciertu de Los Berrones y de la Orquesta Grupu Límite.

Na mañana del 6 de setiembre, en Colunga, el públicu que visite'l conceyu de Colunga esti día van tener entrada gratuita al Muséu del Xurásicu d'Asturies (MUJA), que va ufiertar actividaes especiales a lo llargo de tol día como una visita al xacimientu d'icnites de la sablera de La Griega en collaboración col Centru d'interpretación del Sueve, una Yincana Dinosidrera o un taller de mayáu de mazana, ente otres actividaes.

Amás, en Colunga, podrá disfrutase d'un pasucáis cola Bandina L'Emboláu, la esposición Sidra na Casa de Cultura, y del conciertu de Petit Pop na Plaza de la ilesia de San Cristóbal.

Yá en Villaviciosa'l 6 de setiembre, el centru de la villa se Ilenará cola música de les bandes de gaites participantes nel Festival Internacional de la Gaita y el Parque del Pelambre va acoyer el mercáu d'esti Festival. Tamién va haber xornada de puertes abiertes nos llagares El Gaiteru y Cortina, con un tren sidreru con animación.

La música centra la programación en Villaviciosa que va acoyer los conciertos del gaiteru Hevia y de la moza cantante asturiana Eva Hevia. Tamién, en collaboración col Festival Internacional de la Gaita, van ufiertase les actuaciones de Malin Lewis, Felpeyu y Skama La Rede, amás d'un espectáculu de drones.

Na mañana del 7 de setiembre, en Cabranes, al mercau tradicional na Plaza del Emigrante de Santolaya, súmase la esposición na Casa de Cultura Cabranes, cultura y tradición. Los más pequeños van disfrutar colos Xuegos a lo grande y va haber degustaciones de sidra y zusmiu ecolóxicu y d'arroz con lleche y boroña, amás d'una preba de sidra con Tano Collada.

Tamién se va realizar un taller d'axedrez y partíes simultánees y una demostración del traxe tradicional de Cabranes, van ufiertase vuelos cautivos de globu aerostáticu y, a lo llargo de tol día, habrá entrada gratuita al Muséu de la Escuela Rural, en Viñón. La nota musical podránla los pasucáis d'Hermanos Joglar y el conciertu sesión vermú de Los Acebos.

Polo que se refier a Bimenes, el 7 de setiembre na capital del conceyu, Martimporra, va poder disfrutase d'una xornada de puertes abiertes y animación teatral nel Palacio Marqués de Casa Estrada. Los Yerbatos y La Pandorga van ser los encargaos de l'ambientación musical y folclórica nel prau del Palacio onde tamién va haber cantar asturianu y va poder vese una exhibición de llucha Valtu asi como participar nuna degustación y ellaboración en vivu de chorizu a la sidra. Les actividaes en Bimenes rematen col conciertu de la Orquesta Dominó.

El 8 de setiembre, en Nava, el Muséu de la Sidra ofrecerá esi día entrada de baldre a tolos visitantes que tamién van poder disfrutar de cantar asturianu, d'ambientación costumbrista na redolada del equipamientu, d'una clase maxistral de sidra y d'una preba de sidra con José Norniella.

En Nava va haber mercáu y xuegos tradicionales y van ufiertase vuelos cautivos de globu aerostáticu, amás d'un tren sidreru con animación pola villa y el pasucáis de la Banda de Gaites Llariegu.

La ilesia de San Bartolomé va acoyer l'alcuentru colos coros de la Contorna de la Sidra y na Plaza Manuel Uria va poder trate l'actuación sesión vermú de Quería Margot y el conciertu de la Orquesta Tekila.

Les visites teatralizadas a la Cueva de San Pedrín, les visites guiaes a Ilagares de Sariegu y Villaviciosa y a la Yeguada Finca Meza, delles actividaes nel Muséu del Xurásicu d'Asturies y los vuelos cautivos de globu aerostáticu tienen places llimitaeses, polo que ye necesario realizar inscripción previa na web. El programa completu pal Día d'Asturies pue consultase nel siguiente enllaz: https://asturiesculturaenrede.es.

L'alcalde de Villaviciosa, Alejandro Vega, como anfitrión, tomó la palabra nel l'actu d'esti miércoles pa destacar l'arguyu que supón acoyer la presentación y sorrayar la coincidencia de los díes de celebración con distintos acontecimientos na capital de la mazana, como'l Festival Internacional de la Gaita, la Fiesta de la Sidra y les xornaes previes a les Fiestes d'El Portal.