La rasa mariñana elévase a dos velocidaes n'Asturies

UVIÉU, 21 May. (EUROPA PRESS) -

Una investigación de la Universidá d'Uviéu estableció que la rasa mariñana cantábrica -el relieve planu ente la mariña de Cantabria y la de Burela (Lugo)- elevóse más dende'l Cabu Peñes escontra l'oriente qu'escontra l'occidente. La elevación, de naturaleza homoxénea nel cachu mentáu de la zona centro-oriental asturiana, ta rellacionada cola espesura de la corteza terrestre nel marxe cantábricu.

Los resultaos del estudiu, desenvueltos nel marcu de dos proyectos d'investigación, acaben de publicase na revista 'Geomorphology'. L'orixe de la rasa costera cantábrica ta rellacionáu cola acción del mar y correspuéndese con una antigua plataforma d'abrasión marina. A partir de modelos dixitales del terrén de resolución alta y al traviés de programes informáticos, la Universidá investigó la so xeometría.

Al Oeste del Cabu Peñes, la rasa va menguando'l so altor progresivamente, hasta sumir na zona de Burela. Nel Cabu Peñes reparóse una resquiebra na rasa costera y un saltu de 50 metros nel so altor. Esto ye por mor del movimientu de la conocida falla de Ventaniella.

Con esta investigación pudieron desvelase distintes incógnites sobre la evolución tectónica de la rasa nos últimos cientos de miles d'años y establecióse un modelu rexonal nuevu d'elevación del marxe cantábricu, al entendese meyor cómo se produció la elevación.

Los firmantes del estudiu foron Carlos López- Fernández, Sergio Llana-Fúnez, Gabriela Fernández-Viejo, María José Domínguez- Cuesta y Luis María Díaz-Díaz del Departamentu de Xeoloxía de la Universidá d'Uviéu.