Los rebeldes aseguren dende Bir al Ghanam que Trípoli ye'l so próximu oxetivu

BIR AL GHANAM (LIBIA), 8 d'Agostu (Reuters/EP)

Los rebeldes anunciaron tres tomar la población de Bir al Ghanam que'l so próximu oxetivu ye atacar Trípoli, asitiada tan sólo a 80 kilómetros al sur de la capital. Cola toma d'esta población los rebeldes llograron consolidar lo que tornó yá na so posición más cercana a Trípoli dende qu'entamara l'enfrentamientu armáu.

Les milicies sublevaes llevaben dende últimos de xunu acampaos pel entornu de Bir al Ghanam, ante la feroz resistencia de les fuerces lleales al líder libiu, Muamar Gadafi, pero a lo último llograron facese col control de la población mientres el fin de selmana cola ayuda de l'aviación de la OTAN.

Los mesmos rebeldes saben que'l camín hacia Trípoli pasa per Zawiya, ciudá asitiada na costa mediterránea, a unos 50 kilómetros al oeste de Trípoli. Ellí produxéronse dos intentos fallíos d'alzamientu contra Gadafi dende qu'entamara la revuelta, en febreru. Ello ye que munchos de los guerrilleros que participaron na toma de Bir al Ghanam son de Zawiya y munchos de los sos compañeros tán agora en prisión o muertos.

"El nuesu oxetivu ye llegar a Zawiya. Cuando lo llogremos, Gadafi va tar acabáu", señaló ún de los milicianos, Murái Bada, en declaraciones a un corresponsal de Reuters movíu hasta Bir al Ghanam.

El periodista de Reuters foi testigu de qu'en Bir al Ghanam yá nun queden fuerces gadafistes, tan sólo dellos carros de combate y pieces d'artillería abandonaes. Tamién yeren visibles los cráteres probablemente causaos polos bombardeos de la OTAN.

Mientres la ofensiva insurxente morrieron cinco milicianos, según relaten los mesmos rebalbos. Ente ellos había un libiu-estaounidense, ún de los munchos estranxeros con raigaños libios que tornaron al país pa combatir contra Gadafi.