Retirada la valla contra'l turismu que la formación asturianista Aína instalara en Villaviciosa

UVIÉU 16 Ago. (EUROPA PRESS) -

La valla publicitaria con un mensaxe contra'l turismu que'l partíu asturianista Aína instalara nel Parque de la Barquerina, en Villaviciosa, retiróse y l'espaciu yá ta disponible pa cualesquier anunciante.

Foi esti martes cuando trescendió qu'Aína asitiara na valla un mensaxe col lema "¿Una Asturies pal turismu? ¿O una Asturies pa quien vivimos nella?".

L'Asociación d'Autónomos Comerciantes y Servicios de Villaviciosa (Acosevi) salío al pasu y mostró públicamente'l so refugu a la campaña d'Aína al considerar que'l lema escoyíu yera desafortunáu y faltaba de los visitantes que recibía Villaviciosa.

Tamién foron críticos dende l'equipu de Gobiernu municipal. L'alcalde de Villaviciosa, Alejandro Vega, llamentó l'allugamientu d'una valla qu'al so xuiciu perxudicaba al sector turísticu. Pa él, la campaña entemecía cuestiones mui distintes rellacionándoles de forma negativa colos visitantes, y el sector turísticu, y en conflictu colos vecinos. "Consideramos que se trata d'un tratamientu inxustu con un sector económicu mui importante como ye'l sector servicios, xenerador d'empléu y actividá económica", declaró'l primer edil.

Depués de la polémica xenerada a lo llargo d'esti martes, el mensaxe de la valla publicitaria yera retiráu na mañana d'esti miércoles y ta disponible pa cualesquier anunciante.