Saint Gobain suspende temporalmente la so producción n'España

AVILÉS, 20 Mar. (EUROPA PRESS) -

La multinacional francesa Saint Gobain Building Glass anunció esti vienres la suspensión temporal de la so producción nos sos dos plantes d'España asitiaes n'Avilés y Arbós planteando un ERTE a tolos trabayadores pol estáu d'alarma pa frenar l'espardimientu del Covid-19, según confirmó en nota de prensa la dirección de la empresa.

Esta midida, qu'afecta a unos 470 trabayadores na planta avilesina, tomóse teniendo en cuenta l'afectación actual de les persones que trabayen nos sos centros y siendo conscientes de qu'esta pue siguir aumentando, Saint-Gobain Building Glass presentó un ERTE que tien el respaldu de la Representación de los Trabayadores de los sos trés centros de trabayu n'Avilés, Arbós y Madrid.

La parada de l'actividá nos centros d'Avilés y d'Arbós va facese gradualmente de conformidá coles necesidaes que marquen los mesmos procesos productivos y de tresformamientu.

Nesti contestu d'inseguranza, Saint-Gobain Building Glass destacó l'apoyu recibíu de los representantes de los Trabayadores a la decisión tomada y igualmente la comprensión de los sos veceros, provisores y empreses collaboradores y treslladó el so apoyu a los afectaos, a les sos families y a tola sociedá.