Semper (PP) descarta averar presos d'ETA pero ve posible tresferir la política penitenciaria al PNV

MADRID, 5 de Xunetu (EUROPA PRESS)

El voceru del PP nel Parlamentu vascu, Borja Semper, refuga que l'Executivu central negocie col PNV un averamientu de los presos d'ETA al País Vascu p'allanar el camín a la investidura de Mariano Rajoy, pero sí ve posible falar de tresferir la política penitenciaria, cosa que ta prevista nel Estatutu d'Autonomía vascu.

En declaraciones a la Cadena Ser, recoyíes por Europa Press, Semper mostróse "sorprendíu" pol fechu de que'l lehendakari, Íñigo Urkullu, reclamara'l fin de la dispersión de los presos d'ETA porque, magar "nun ye una reivindicación nueva" pela so parte, sorprénde-y que seya una prioridá pa él nestos momentos, cuando nun lo ye nin pa los vascos nin pal conxuntu de los españoles.

A la so manera de ver, a quien tendría de "apretar" Urkullu ye a la mesma ETA, que ye la que torga a los sos presos reinsertase y sigue faciendo usu d'un frente de 'makos' pa utilizalos na so estratexa. Semper sorrayó qu'España tien una de les llexislaciones más avanzaes en materia de reinserción pero ye la mesma ETA la que torga a los sos presos acoyese a ella pa nun aceptar la llegalidá española.

Asina, defendió que "la política de dispersión dio resultaos", de manera que debe imperar el sen común y "nun se debe amasuñar" lo que funciona, incluyendo'l caltener abiertes víes de reinserción como la llamada 'vía Nanclares', con esi o otru nome. Y añadió qu'agora tien que ser ETA la que se mueva: "La política de dispersión empezó con ETA y va acabar cuando acabe ETA", atayó.

Sicasí, esplicó que la tresferencia de la política penitenciaria al País Vascu ye daqué pendiente dende l'Estatutu d'Autonomía, asina que nun tendría que ser "nengún drama" falar sobre ello. Ello ye que recordó que la competencia foi "una pataca caliente" pal Gobiernu vascu, que nun la quiso "cuando ETA mataba y agora resulta más fácil".

Tocantes a la reclamación de que'l Gobiernu central acepte la reforma del Estatutu de Gernika qu'apruebe'l Parlamentu vascu, Semper retrucó que la Cámara autonómica lleva trés años aldericándolo nuna ponencia y nun foi capaz depactar un testu articuláu, asina que cree que nun tien sen pidir a otros qu'acepten lo qu'ellos tovía nun consiguieron acordar.