"Tán riéndose d'Asturies", afirmen los trabayadores depués del 'plantón' de Vesuvius

UVIÉU, 7 Oct. (EUROPA PRESS) -

El presidente del Comité d'Empresa de Vesuvius en Llangréu, Juan Manuel Suarez Baragaño, acusó a la dirección de la empresa de "rise d'Asturies" depués de que nun fueran a la primer xunta del grupu de trabayu sobre la situación de la empresa.

L'alcuentru celebróse esti llunes na sede de la Conseyería d'Industria, Empléu y Promoción Económica, cola presencia del conseyeru Enrique Fernández, y de representantes de trabayadores y de la compañía.

Esta mesa de trabayu busca tratar ente toles partes les posibilidaes de continuidá de la empresa n'Asturies, a pesar del ERE planteáu pola compañía pa zarrar les plantes de Llangréu y Miranda de Ebro. Sicasí, la empresa nun participó nel alcuentru y unvió a representantes d'una subcontrata, alegando problemes d'axenda.

Una situación qu'a xuiciu de Bragaño muestra qu'amás de "rise" de los participantes nel alcuentru y de los mesmos trabayadores, la dirección de Vesuvius "ta riéndose d'Asturies". "Que dexen de mandar interlocutores ensin valir, que manden a xente que tengan capacidá de decisión y que pueda rebatir los nuestros argumentos", reclamó.

Con too, el representante de los trabayadores sentenció que l'actitú de la empresa "demuestra que la razón ta con nós". "Nin dieron la cara", señaló, pa criticar que falen d'un problema d'axenda "cuando hai en xuegu 128 families que si tienen l'axenda colgando".

Esti martes y esti miércoles trabayadores y empresa van volver aconceyar nel Sasec n'Uviéu. Per otru llau, la mesa de trabayu espera volver aconceyar el vienres día 11.