AVILÉS, 20 Mar. (EUROPA PRESS) -
El númberu d'usuarios del Centru Niemeyer aumentó nun 25,53% en 2017, pasando de los 99.480 de 2016 a los 124.880 del exerciciu pasáu. Los espectadores de les esposiciones, obres, charres del Ciclu de la Palabra y de la programación cinéfila suponen cuatro de cada cinco usuarios, según punxo de relieve esti martes el presidente del patronatu y viceconseyeru de Cultura del Principáu, Vicente Domínguez, qu'ufiertó una rueda de prensa previa a la xunta.
El mes d'agostu foi'l que más usuarios concentró, un terciu del total, siguíu de los d'abril y avientu, coincidiendo colos periodos vacacionales. La metá de los espectadores de les esposiciones vienen de otres comunidaes autónomes, el 14% d'Avilés, otru tantu d'otros países y el 22% del restu d'Asturies.
Domínguez esplicó que, en parte, esa medría d'usuarios débese a "lo bien que funcionó la esposición de Julio Verne, con colexos, institutos y grupos familiares. La de Bacon nun tien un espectru tan ampliu". El presidente del patronatu defendió que "los centros culturales son los centros de salú de l'alma, a naide se-y ocurriría reivindicar qu'un centru de salú tuviera rendimientu económicu" y sorrayó que se programa "pensando nel ciudadanu".
Sobre los patronos privaos Domínguez indicó que nel Centru Niemeyer síguese la tónica d'otros espacios. "Camudó la dinámica, les empreses pasaron de facer una aportación anual y tar nos patronatos a collaborar con acciones específiques, nun quieren que'l so dineru sía pa pagar l'agua y la lluz".
El presidente del patronatu indicó que nel alcuentru próximu van aprobase les cuentes "que tán documentadas y equilibraes" y señaló que sobre'l pagu de la delda "too marcha correchamente". Queda por devolver les subvenciones del Principáu, básicamente.
Carlos Cuadros, director del Centru Niemeyer, defendió'l calter divulgativu del espaciu. "Lo importante nun ye la medría numbérica, sinón los aspectos cualitativos de la programación y el so calter educativu. "Primero piénsase na contorna, depués n'Asturies y según los datos vemos que xenera interés n'España y otros países".
Nel presupuestu pa 2018, que xube a 2,6 millones d'euros, "hai un apueste grande poles esposiciones, que son cares y tienen una torna mínima, pero tienen esa función formativa". La primera va llegar a mediaos d'abril y de la mano d'Avelino Sala. Trátase d'una muestra producida pol centru y na que lleven trabayando dos años y mediu.
Andalucía
