Xeira refuga la denominación de 'fala eonaviega' y recuerda que'l nome de "consensu" ye gallego-asturianu

UVIÉU 30 Jun. (EUROPA PRESS) -

L'asociación Xeira reclamó esti miércoles un tratu igualitariu pal asturianu y pal gallego-asturianu nuna posible reforma del Estatutu. Nesi sentíu, indicaron que sería "un pasu atrás" la denominación de 'fala eonaviega' propuesta pola Academia de la Llingua Asturiana (ALLA) y recordaron que gallego-asturianu ye'l nome "consensuáu" hai 30 años ente'l Gobiernu rexonal y los espertos del Navia-Eo.

Al traviés de nota de prensa, la principal asociación de defensa del patrimoniu llingüísticu del Occidente recordó que l'ALLA tien reconocío nos sos estatutos la potestá de velar pol "gallego-asturianu".

Por eso, califiquen de "llamativo" qu'agora la institución tenga "esti cambiu d'intenciones" y que na III Encuesta Sociollingüística del Navia-Eo recueya que'l 65% de la población noma al so idioma como 'fala eonaviega', "cuando na anterior encuesta nun aparecía, porque naide lo usaba, nin l'Academia". "Ye evidente que dalgo nun encaxa", indiquen.

Xeira reclama pal gallego-asturianu un tratu igualitariu col asturianu y "nun rebaxar el nome oficial de llingua a 'fala' poles sos implicaciones filolóxiques y sociales". "O nun se ta entendiendo la realidá histórico-llingüística de la zona, o bien esto se ta faciendo con intenciones mui poco ortodoxes nunos tiempos nel que, más que nunca, tolos sectores que queremos la oficialidá tenemos que tar xuntos de la mano", afirmen.

La entidá recuerda que gallego-asturianu ye'l términu que se consensuó hai 30 años ente Principáu, estudiosos, profesoráu y movimientu de reivindicación llingüística del Navia-Eo y qu'amás ye la denominación que sigue la tradición filolóxica y que respeta la llexislación y les titulaciones oficiales.

Por eso, reclamen que nun se cuestione esti términu y refuguen l'usu de 'eonaviegu' porque "sería un pasu atrás". "Un tratu que nun sía igualitariu nin respetuosu pa con esta llingua va prender llume a Asturies dientro d'Asturies", sentencien.