UVIÉU, 30 Abr. (EUROPA PRESS) -
La Xunta Xeneral del Principáu d'Asturies aprobó, colos votos de PSOE, IX y la diputada del Grupu Mistu Covadonga Tomé, tomar en consideración la reforma de la llei d'espectáculos públicos pa llimitar l'accesu de los menores d'edá a espectáculos taurinos.
La iniciativa, presentada por IX-Convocatoria por Asturies, busca modificar la llei pa prohibir a los menores de 18 años acceder a les places de toros cuando se celebren espectáculos taurinos, y encamienta a instalar cartelos qu'alviertan de que l'espectáculu pue mancar la sensibilidá de les persones. Tamién se pide que nun se puedan vender nin consumir bébores alcohóliques nestos espectáculos.
La reforma contempla tamién que se va cuntar como infracción "mui grave" l'asistencia de cada menor d'edá, con una sanción individualizada.
El diputáu d'IX-Convocatoria por Asturies, Xabel Vegas, defendió la iniciativa asegurando que nun pretende "abrir un debate sobre la tauromaquia", sobre too "nuna comunidá autónoma como esta na que, afortunadamente, nunca hubo afición a los toros". Con esti cambiu, lo que se pretende ye "garantizar la seguridá y la protección a los menores na celebración d'espectáculos taurinos n'Asturies".
"Tamos falando d'unos espectáculos que, más allá de la opinión de cada cual sobre los mesmos, tienen unes característiques singulares: son espectáculos sangrientos y que se basen na violencia exercitada", dixo, destacando que la esposición a estes imáxenes "pue tener consecuencies nel desarrollu educativu, cognitivu y emocional del menor".
Nes intervenciones del restu de parllamentarios, el diputáu del Grupu Mistu Adrián Pumares (Foru), reprochó a Vegas que "lo que-y cafia" nun ye que los menores vaigan a los toros, sinón que'l ministru de Cultura, de Sumar, "tuvo qu'aplaudir y concedió la medaya d'honor de les belles artes a los empresarios taurinos de la Ganadería Miura". "Yo nun voi a ser cómpliz d'esti ataque a la tauromaquia", aseguró, defendiendo que "les sos motivaciones son mui distintes a la protección de los menores".
La diputada del Grupu Mistu Covadonga Tomé sí quixo abrir el debate sobre la tauromaquia y defendió una Asturies "llibre d'esti tipu d'espectáculos innecesarios". "La tortura de los animales en públicu nun tien absolutamente nada que ver cola cultura, nin colos valores qu'ésta trái. Nun ye cultura, nin ye arte, nin ye deporte. Ye una otomía", defendió.
Per otru llau, la portavoz de Vox, Carolina López, cuestionó que se prohiba l'accesu de los menores a los espectáculos taurinos, poniendo de manifiestu que "les escueles taurines tán llenes de neños que quieren ser toreros". "Toreen becerros per toa España. Toreen y depués vienen equí y nun puen aportar a la plaza de toros", reprochó.
Dende'l PP, el diputáu José Luis Costillas preguntóse si "esto ye tolo que creen qu'hai que camudar" de la llei, asegurando que podría "dicir coses" de los conciertos, festivales, feries, verbenes o'l circu. "Lo único que-yos importa son los espectáculos taurinos, como hai tantos n'Asturies", ironizó, asegurando que "esti cambiu nun obedez nin a una necesidá social, nin soluciona un problema persistente, y namás ye una cuestión cosmética y ideolóxica".
P'acabar, el diputáu del PSOE Ricardo Fernández señaló que, "ensin anticipar nada" apoyen la toma en consideración d'esti cambiu, dende'l puntu de vista de que "empieza un trámite" que va permitir un debate posterior. "Si tamos falando de la protección del interés del menor, creo que nos lo tenemos que tomar en serio", dixo.
Andalucía
