Llocalizada una cría de foca gris na playa de San Lorenzo (Xixón)

UVIÉU, 4 de Febreru (EUROPA PRESS)

Un exemplar de foca gris ('Halichoerus grypus') de bien poco tiempu de vida, non más de dos meses, apaeció na nueche d'esti domingu nel entornu de la ilesia de San Pedro, en Xixón, concretamente na Escalera 0 del paséu de la playa de San Lorenzo. L'animal presentaba una hipotermia aguda y taba bien delgáu, según informó la Coordinadora pal Estudiu y la Protección de les Especies Marines.

A les 21.00 hores de la Policía Nacional alertaba de la presencia de la foca. El personal de Cepesma tuvo que metese nel agua pa rescatala, cola collaboración de los axentes y de viandantes. Llograron garrala nuna zona cercana al Club Ástur de Regatas.

Ante la presencia de numberosos curiosos, pa evitar estrés, introduxeron al animal na unidá móvil con calor hasta la so llegada al Centru de Recuperación que xestiona Cepesma nel Parque de la Vida en L.luarca. Procedió a l'alministración de sueru nun primer momentu y a realiza-y una intubación pa suministra-y una papiella alimentaria. La temperatura corporal restablecióse y sobre les 5.00 hores dexáronla na zona de cuarentena.

De momentu l'exemplar evoluciona satisfactoriamente pero hasta que nun supere los dos primeros díes nun va haber plena confianza na so recuperación, dao que ye determinante una diarrea y la yá enunciada pérdida de recursos grasos. La estremada delgadez y la consiguiente falta de grasa corporal como aislante térmicu fai que nun puean evolucionar satisfactoriamente en llibertá, aumentando'l riesgu de muerte ante les escases posibilidaes d'alimentase adecuadamente por falta de fuerces.