UVIÉU, 11 d'Abril (EUROPA PRESS)
El maxistráu Ángel Sorando decidió presentar la so astención como encargáu de la instrucción de la operación 'Marea', presunta trama de corrupción na contratación de l'Alministración asturiana pola que ta investigándose a delles persones, ente elles l'ex conseyeru socialista d'Educación, José Luis Iglesias Riopedre.
Sorando tomó esta decisión dempués de recibir una sanción leve por realizar unes declaraciones en prensa, tres una quexa formulada pol fiscal xefe d'Asturies, Gerardo Herrero. Si nenguna de les partes recurre l'autu pol que Sorando renunció al casu, l'asuntu va axudicase a otru xuez, según el cuadru de sustituciones previstu pa estos casos.
Ángel Sorando ye'l segundu xuez que se fai cargu d'esti asuntu, dempués de que la Estaya Octava de l'Audiencia Provincial d'Asturies, ordenara nel mes d'abril de 2011 la inhibición de la conocencia de causa per parte de la xueza d'Instrucción númberu 4 de Xixón, Ana López Pandiella.
Foi precisamente Pandiella la qu'entamó les investigaciones d'esti asuntu de resultes d'una denuncia particular. En xineru del 2011 ordenó daquella l'ingresu en prisión del ex conseyeru d'Educación, José Luis Iglesias Riopedre, amás de la so númberu dos, María Jesús Otero, y de la funcionaria Marta Renedo Avilés. Falábase de delitos de malversación de caudales públicos, de prevaricación y de fraudes y exacciones illegales.
La xuez decretó'l secretu de sumariu, lo que nun daba accesu a les partes a les sos investigaciones. Tamién dos empresarios resultaron deteníos pol casu y a lo último, en pagando la fianza correspondiente, volvieron a les sos cases.
Pero tres un recursu del Ministeriu Fiscal, l'Audiencia Provincial xustificó n'abril del 2011 la so decisión de treslladar l'asuntu a Uviéu, argumentando que los delitos cometiérense na capital asturiana, que ye onde tien la so sede l'Alministración defraudada -el Principáu d'Asturies-, onde trabayaben trés de les persones imputaes (José-Luis Iglesias Riopedre, María-Jesús Otero y Marta Renedo Avilés), y dende onde necesariamente s'ordenaron los supuestos pagos.
Riopedre salió de la cárcel de Villabona'l 7 de marzu del 2011 tres el pagu d'una fianza de 100.000 euros, col compromisu de comparecer periódicamente nel xulgáu.
De siguío, seis meses dempués del so ingresu en prisión, volvería a la so casa Oteru, baxo fianza de 200.000 euros. Entós yá taba'l casu en manes de Sorando, que llevantara parcialmente'l secretu de sumariu.
La última en salir de la cárcel foi la funcionaria Marta Renedo. Fízolo nel mes de setiembre, en pagando una fianza de 200.000 euros.
Los empresarios Víctor Manuel Muñiz y Alfonso Carlos Sánchez tamién tán imputaos nesti asuntu de presunta corrupción na Alministración asturiana, que tamién afecta a más persones. Ello ye que'l pasáu mes de febreru conocía la destitución de la subdirectora de xestión de Cabueñes, imputada por esti asuntu.
