Zapico (IU) agradez los apoyos p'asoceder a Orviz pero tovía nun se planteó la candidatura

UVIÉU, 5 de Xunetu (EUROPA PRESS)

El diputáu d'Izquierda Unida na Xunta Xeneral del Principáu, Ovidio Zapico, mostróse agradecíu polos apoyos qu'una potencial candidatura suya a coordinador xeneral de la coalición n'Asturies atropa nuna parte de la militancia, anque esclaró que tovía nun se planteó esta posibilidá.

Zapico respondió asina a preguntes d'Europa Press pol fechu de que'l so nome seya unu de los que suenen ente les bases d'IU pa liderar una candidatura na asamblea autonómica na que va escoyese al próximu coordinador xeneral d'Asturies. L'actual responsable del cargu, Manuel González Orviz, yá anunció que nun se presentará a la reelección.

El diputáu autonómicu llendóse a pidir "un procesu asambleariu tranquilu". Na so opinión, IU tien que buscar a "un candidatu qu'axunte'l mayor númberu de sensibilidaes posibles dientro de la organización". Reconoció, sicasí, sentise "afalagáu" por qu'una parte de la militancia piense nél como coordinador xeneral, pero matizó que tovía nun se planteó esta opción.

Los nomes de Zapico y del actual coordinador xeneral d'IU n'Uviéu y exconceyal de la formación nel Conceyu, Alejandro Suárez, son de momentu los únicos que suenen como posibles aspirantes a asoceder a Orviz.