Arabak, Bizkaiak eta Gipuzkoak gehien kaltetutako sektoreei likidezia emateko neurriak adostu dituzte

GASTEIZ, 29 (EUROPA PRESS)

Arabako, Bizkaiko eta Gipuzkoako foru aldundiek neurri sorta bat adostu dute, egungo egoera ekonomiko globalaren ondorioek gehien kaltetutako eragile ekonomikoen likidezia indartzeko. Egoera horren ezaugarri nagusiak dira inflazioa eta energiaren eta lehengaien kostuen igoera, eta horiek ekoizpen katean dituzten ondorioak.

Testuinguru horretan, eta covid-19aren pandemiak sortutako krisiaren aurrean egin zuten bezala, hiru foru aldundiek aparteko neurriak hartu dituzte sare ekonomikoaren sektore ahulenetan egoera hau izaten ari den eragin negatiboa arintzeko, hala nola enpresa txikietan, mikroenpresetan eta langile autonomoetan.

Ramiro Gonzalez Arabako diputatu nagusiak, Unai Rementeria Bizkaiko ahaldun nagusiak eta Markel Olano Gipuzkoako diputatu nagusiak aurkeztu dituzte neurriak, astearte honetan Gasteizen egindako agerraldi bateratuan.

Neurri horiek honako hauek dira: zergen ordainketan aparteko geroratzeak ematea, interesik eta bermerik gabe; PFEZren ordainketa zatikatuak ordaintzetik salbuestea; gastuen forfaita handitzea; lehen sektoreari dirulaguntza berriak ematea.

Horrela, alde batetik, langile autonomoek, mikroenpresek eta enpresa txikiek aparteko gerorapena izango dute zergen ordainketetan, eta ez dute bermerik aurkeztu beharko. Foru ogasunek emango dituzten geroratzeek ez dute interesik sortuko, eta geroratutako zenbatekoak itzultzeko zenbateko berdina izango duten sei hileko kuotatan ordaintzea eskaintzen dute, hiru hilabeteko gabealdi baten ostean.

Bestalde, jarduera ekonomikoak egiten dituzten pertsona fisikoak ez dira behartuta egongo PFEZren ordainketa zatikatuak autolikidatu eta ordaintzera urteko lehen bi hiruhilekotan.

Hirugarren neurria gastuak konpentsatzeko forfaita handitzea da, mikroenpresek eta langile autonomoek beren zerga oinarria murrizteko, dela Sozietateen gaineko Zergan, dela PFEZan. Forfaitaren handitzeak indar berezia izango du salgaien errepideko garraioan, nekazaritzan eta abeltzaintzan, hiru lurraldeetan %70eraino igotzen baita. Forfait orokorra, bai PFEZan (langile autonomoak), bai Sozietateen gaineko Zergan (mikroenpresak), %15eraino igotzen da.

Halaber, hiru foru aldundiek erabaki dute zuzeneko dirulaguntzen lerro berria martxan jartzea lehen sektoreari laguntzeko: 2,5 milioi euro Araban, 1,2 milioi euro Bizkaian eta 1,7 milioi euro Gipuzkoan.

BALORAZIOA

Hitzaldien txandan, Errusiaren inbasioa hasi zenetik hiru aldundiek mantendu duten koordinazioa eta elkarlana nabarmendu ditu Ramiro Gonzalezek, eta beren "eskumen nagusia den fiskalitatea" erabiliko dutela. Hiru foru aldundiak konprometituak eta koordinatuta gaude. Hiru diputatu nagusiek elkarrekin lan egin dute, erantzun horren buru izateko", adierazi du.

Gaineratu duenez, "beharrezkoa dena egingo dugu gure produkzio sareari egoera honi aurre egiten laguntzeko. Gure eskumenen esparruan egingo dugu. Ezinbestekoa da enpleguari eta gizarte kohesioari eusteko".

Bestalde, Ukrainako inbasioaren "zentzugabekeria" deitoratu du Unai Rementeriak, eta azpimarratu du gerra pairatzen ari diren pertsonak direla kaltetu nagusiak. Gainera, azpimarratu du abiatutako neurriek gure ekonomian eta gure pertsonengan izaten ari den ondorioak arintzen saiatuko direla. Balioa eman dio hiru aldundien ekintza bateratuaren eraginkortasunari, "baliabideek gehien behar dutenen esku jarraituko dutelako, gehien behar dutenean".

Azkenik, Markel Olanok ere elkartasuna adierazi dio Ukrainako herriari, eta, testuinguru ekonomikoari dagokionez, egungo eta etorkizuneko erronkei erantzuteko elkarlanean aritzearen garrantzia azpimarratu du.

"Erakundeen eta lurraldeen arteko lankidetza gaur agerraldi honetan irudikatu dugu. Baina lankidetzan ari gara baita gure ehun ekonomikoarekin, gure enpresekin, elkarteekin eta langileekin ere, eta horiei eman nahi diegun mezua da ateak irekita ditugula, eta ahal dugun guztian laguntzeko borondatea ere badugula", esan du.