Bilboko Koral Elkartearen Euskeria Abesbatzak Arestiren poemak kantatuko ditu Bilboko Guggenheimen

BILBO, 2 (EUROPA PRESS)

Bilboko Koral Elkartearen Euskeria Abesbatzak Gabriel Arestiren poemak kantatuko ditu Guggenheim Bilbao Museoan datorren astelehenean, urriaren 6an, Euskaltzaindiak bilbotar idazle eta euskaltzain urgazlearen heriotzaren 50. urteurrena gogoratzeko antolatutako egitarauaren baitan.

Euskaltzaindiak jakinarazi duenez, Euskal Herriko Unibertsitatearekin (EHU), Gabriel Aresti Kultura Elkartearekin eta Bilboko Koralarekin elkarlanean prestatu du egitaraua, Eusko Jaurlaritzaren, Bizkaiko Foru Aldundiaren, Bilboko Udalaren, EiTBren eta BBKren babesa duela.

Oro har, Gabriel Aresti bera eta beronen lanak ezagutzera ematea da egitarauaren xede nagusia. "Hortaz, Arestiren ekarria balioan jarri nahi da, hots, beronen lanak duen meritua aitortu, balioetsi eta ezagutarazi, Arestik euskal literatura modernizatzeko eginiko ahalegina gogoraraziz eta euskararen batasunaren hastapenetan izan zuen eragina eta ikuspegi fin zorrotza nabarmenduz", azaldu dute Akademiatik.

Hori dena betetzeko, hamar ekimen aurkeztu ziren ekainean (hitzaldiak, antzerki saioak, kontzertuak, erakusketak eta liburu-aurkezpenak), eta batzuk ekainean bertan egin ziren: Bilboko Udalaren Txistularien Bandaren 'Aitaren Etxea' kontzertua; 'Gabriel Aresti 1975-2025' jardunaldi akademikoa, EHU eta Gabriel Aresti katedraren eskutik, eta 'Gabriel Arestik ereindakoak' liburuaren aurkezpena (Gabriel Aresti katedrak ondutakoa).

Egitarauari jarraiera emanez, astelehenean, urriak 6 dituela, Bilboko Koral Elkartearen Euskeria Abesbatzaren kontzertua izango da Bilboko Guggenheim museoan, Museoaren Adiskideentzat bakarrik (sarrerak eskuragarri daude museoaren webgunean). Euskal musikari eta poesiari eskainitako emanaldia izango da, eta Arestiren lanak protagonismo berezia izango du. Kontzertua ETBk grabatuko du eta ondoren telebistan emango da.

Kontzertua 20:00etan hasiko da eta ordu eta laurden iraungo du. Bilboko Koral Elkarteko Euskeria Abesbatzarekin batera, bertan izango dira Antton Telleria (bateria), Antxon Sarasua (teklatuak), Ander Ederra (gitarra), Joanes Ederra (baxu elektrikoa) eta Bea Asurmendi kantautorea (Asurmendi Giovanni Cresseri baxu jotzailearekin batera arituko da). Kontzertuaren dramaturgia osatzeko, Idoia Jauregi kazetariak Arestiren olerkiak irakurriko ditu.

Urtea amaitu orduko, beste bi kontzertu emango dira egitarauaren baitan: abenduaren 4an BBK Salan 'Aresti mug(h)arri' pieza eszenikoa, Joxan Goikoetxea zuzendariak atonduta, eta abenduaren 10ean Arriaga Antzokian Bilboko Koral Elkartearen kontzertua.