Bizikletaz egingo den kanpamentu ibiltarian eta musika udalekuetan parte hartzera animatu du Gasteizko Udalak

GASTEIZKO UDALA

GASTEIZ 31 May. (EUROPA PRESS) -

Gasteizko Udalak haur eta gazteak animatu ditu udan bizikletaz egingo den kanpamentu ibiltarian eta musika udalekuetan oraindik ere libre geratzen diren tokietan izena ematera. Bi jarduerak 'Udan gozatu' udako aisialdiko eskaintzan sartuta daude.

Zehazki, Ekoastea bizikletan egiteko kanpamentu ibiltarian (16-18 urte), musika udalekuetan (5-12 urte) eta jantokirik gabeko jolas txokoetan (4-6 urte) parte hartzeko aukera dago, Gasteizko Udaleko iturriek jakitera eman dutenez.

Ekoastea uztailaren 1etik 5era bitarte egingo da 'Vasco Navarro' deritzon bide berdetik, Gasteiztik Lizarrarako tartean (etapak: Maeztu-Acedo; Acedo-Murieta-Villamayor de Monjardín; Villamayor de Monjardín-Lizarra; Lizarra-Gasteiz). Bide berdetik sartu-irteerak egingo dira inguruko gunerak, biztanleak, ekoizleak edo eragileak bisitatzeko.

Musika udalekuek astebeteko iraupena izango dute eta Luis Aramburu Udal Musika Eskolan eta Musikaetxea Folklore Akademian egingo dira. Jantokirik gabeko jolas txokoak, aldiz, Lopez de Guereñu, Salburua, Miguel de Cervantes eta Aita Orbiso eskoletan izango dira astelehenetik ostiralera.

Leku libreetan izena emateko epea ekainaren 4an amaituko da. Izen-ematea sarean edo aurrez aurre egin daiteke, Aldabe, Arriaga, Pilar, Hegoalde, Ibaiondo, Iparralde, Judimendi, Lakua, Salburua eta Zabalgana gizarte etxeetan eta Ariznabarrako kiroldegian. Eskaera egiteko jardueraren kodea aldez aurretik prestatzea komeni da, izen-ematea azkarrago egiteko eta tokia lortzeko aukera gehiago izateko.