Darabilbo programak euskarazko aisialdiko doako 12 jarduera antolatu ditu ekainerako Bilbon

BILBO 6 Jun. (EUROPA PRESS) -

Bilboko Udalak eta euskaltegien sareak elkarlanean antolatzen duten Darabilbo programak euskarazko aisialdiko doako 12 jarduera prestatu ditu ekainerako, hala nola argazkigintzako eta joskintzako tailerrak eta proposamen gastronomikoak eta kulturalak.

Bilboko Udalak ohar baten bidez jakitera eman duenez, ekimenaren xedea da bilbotarren artean euskararen erabilera sustatzea eta normalizatzea.

Horrela, ekaineko jarduerak ostegunean hasiko dira, ekainaren 8an, Asier Arroitak zuzendutako argazkigintza lantegi batekin. Zenbait saio izango dira: lehena 11:00etan izango da, Uribarriko udaltegian; 17:15ean eta 19:15ean beste bi izango dira, Indautxuko AEK euskaltegian, eta azkena 20:00etan izango da, Otarkoagako Ugarte plazan. Biharamunerako, ekainaren 9rako, josteko tailer bat antolatu da Santutxuko Bastida plazan, 18:30ean hasita.

Halaber, ekainaren 11n, bederatzi kilometroko ibilaldia antolatu da Artikutzan zehar, 09:30ean irtenda naturgunearen sarreratik. Ekainaren 14an, aldiz, tailer gastronomikoetako bat egingo da: txokolate dastaketa izango da, teoria barne, Mikel Ugarrizaren eskutik, 19:00etatik aurrera Kalderaperakon.

Bestalde, ekainaren 15ean bisita gidatua antolatu da BilbaoArten, Maider Aldasororen eskutik, 19:30etik aurrera, eta ekainaren 22an pintxoen inguruko tailer gastronomikoa izango da, 10:00etan, Zorrotzako AEK euskaltegian.

Ekainaren 23an eta 26an hiru bisita gidatu egingo dira Bilboko Arte Ederren Museoan: ekainaren 23koa 10:00etan izango da, eta ekainaren 26koak 10:00etan eta 17:30ean.

Ekimenotan parte hartzeko ezinbestekoa da aldez aurretik izena ematea darabilbo.eus webgunean, darabilbo@gmail.com helbide elektronikoan edo 607 530 132 telefono zenbakian. Gainera, telefono zenbaki horretara deituta, nahi duenak bere ideiak proposatu ditzake. Jardueretan parte hartzeko baldintza bakarra 16 urte beteta izatea da (familiako jardueretan izan ezik).