EAEk 77.000 biztanle inguru irabaziko ditu hurrengo 20 urteetan

BILBO 31 (EUROPA PRESS)

Euskal Autonomia Erkidegoak (EAE) 2.295.100 biztanle izango ditu 2045eko urtarrilaren 1ean, 1.179.796 emakumeak (%51,4) eta 1.115.304 gizonak (%48,6), termino absolutuetan 77.000 pertsona inguruko hazkundea izanik 2025aren aldean (%3,5 gehiago). Igoera osoaren %78 lehen hamarkadan gertatuko da, hau da, 2025etik 2035era, Eustat euskal estatistika erakundeak egindako proiekzio demografikoen arabera.

Bilakaera demografikoa positiboa izango da EAEko hiru lurralde historikoetan, eta biztanleriaren hazkunde absolutuak antzekoak izango dira Gipuzkoan eta Bizkaian eta txikiagoak Araban. Halere, termino erlatiboetan azken urteetako joera diferentziala finkatuko da, eta Arabak dinamismo demografiko handiena duen lurraldea izaten jarraituko du (%6,6ko hazkundea 2025 eta 2045 artean); ondoren, Gipuzkoa agertzen da (%3,7ko hazkundea), eta Bizkaiko erritmoa, berriz, (%2,4ko hazkundea) EAE osorako aurreikusitakoaren azpitik dago.

Hazkunde erlatiboaren alde horien ondorioz, Arabak pixka bat handituko du pisu demografikoa (% 0,5 puntu), 2045ean EAEn biziko den biztanleriaren %15,7 izan arte; Bizkaiko biztanleriaren pisu demografikoa antzeko mailan jaitsiko da, %51,6ra arte, eta Gipuzkoako biztanleriaren pisuak ia berdina izaten jarraituko du, %32,7 ingurukoa.

EAEko biztanleriaren hazkundea migrazio saldoak bakarrik eragingo du, datozen bi hamarkadetan milioi laurden pertsona baino gehiagoko ekarpena egingo baitu, immigrazioaren eta emigrazioaren arteko aldearen ondorioz. Aitzitik, saldo natural edo begetatibo negatiboa mantenduko dela aurreikusi da, azken urteetan ikusitako joeraren ildotik; saldo horrek, jaiotzen eta heriotzen arteko aldearen ondorioz, gutxi gorabehera 177.000 pertsonako murrizketa ekarriko du, hau da, 8.870 pertsona inguruko batez besteko galera urtero.

Bestalde, 20 urtetik beherako biztanleria, 2025aren hasieran EAEko guztizkoaren %17,3 zena, %15,2ra murriztuko litzateke 2045ean, eta 33.500 pertsona gutxiago izango lituzke (-%8,7). Kalkuluen arabera, 20 eta 64 urte bitarteko biztanleriak 94.900 pertsona inguru galduko ditu 20 urte horietan, hau da, aldi osoan %7,3ko murrizketa izango dela aurreikusi da. Jaitsiera hori 35-49 eta 50-64 urteko taldeetatik dator ia esklusiboki, 35.200 eta 84.000 pertsona gutxiagorekin, hurrenez hurren.

Era berean, 65 urte edo gehiagoko biztanleriaren kopurua 205.300 pertsona inguru haz daiteke; beraz, 2045ean %32,5era iritsiko dela aurreikusi da, hau da, 2025ean baino %8,2 puntu gehiago. Hazkunde erlatibo handienak 85 urteko eta gehiagoko biztanleen artean izango direla aurreikusi da; hala, 2045ean, 153.100 pertsona izango dira, 2025ean baino 64.700 gehiago, hau da, biztanleria osoaren %6,7.

JAIOTZA TASA

Bestalde, jaiotza tasaren susperraldi neurritsua aurreikusi da datozen urteetarako. Susperraldiaren oinarriak izango dira, alde batetik, adin ugalkorrenetan dagoen emakume populazioaren igoera, eta, bestetik, ugalkortasun mailaren susperraldi txiki bat (2024an, emakume bakoitzeko 1,11 seme-alaba izatetik, 2044an, 1,35 seme-alaba izatera igaroko litzateke).

Bi faktore horiek uztartuta, jaiotza kopurua handitu egingo da: 2024an 12.900 jaiotza izan ziren, eta 2044. urtearen amaierarako, berriz, 17.600 jaiotza izatea aurreikusi da. Horrela, %36ko igoera izango da.

Orobat, jaiotza uneko bizi itxaropena 89,2 urtera iritsiko litzateke emakumeen kasuan 2044an, eta 84,9 urtera gizonen kasuan, 2024an 87,2 eta 81,9 urtekoak ziren bitartean -Europar Batasuneko batezbestekoa baino altuagoak-. Jaiotza uneko bizi itxaropena emakumeen eta gizonen artean 5,3 urtekoa zen 2024an, eta 2044an 4,3 urtekoa izatea aurreikusi da.

MIGRAZIO SALDOA

Bestalde, aurreikusitako aldi osoa hartuta, EAEra 53.200 etorkin inguru etorriko lirateke urtean; 2024an 59.000 izan ziren, eta 2044an 51.000 izango direla auirreikusi da. Atzerritik etorriko diren etorkinak urtean 32.200 izatea zenbatetsi da, hau da, %60,5, eta proportzio hori 2024koa baino pixka bat txikiagoa da, urte horretan atzerritik etorritako pertsonen proportzioa %64,3koa izan baitzen EAEn.

Emigrazioak, berriz, urtean 40.500 inguru izango direla kalkulatu da 2025-2044 aldi osorako; 2024an, 38.107 izan ziren, eta horietatik %49 atzerrira joan ziren. Datozen bi hamarkadetarako, banaketa ia %50ekoa izango da atzerrira eta Espainiako gainerako lekuetara bizitzera joango direnen artean.

Beraz, bi osagai horien bilakaeraren ondorio den migrazio saldoak urtean 12.700 pertsona emango lituzke 2025-2044 aldi osoan; hala ere, 2025-2034 aldiko balioaren -batez besteko saldoa 15.400 pertsona urtean- eta 2035-2044 aldian emango denaren -10.000 pertsona urtean- artean bereiz daitezke. Migrazio saldo ia osoa atzerriarekin egindako trukearen ondorio da.

Lurralde historikoka, aldi horretan, Bizkaiak 7.300 pertsonako saldo positiboa izango luke urtean, Gipuzkoak 3.100 pertsonakoa eta Arabak 2.300 pertsonakoa. Lurralde historikoen arteko migrazio mugimenduei dagokienez, mende honetan gorakada jarraitua izan da: 2000-2002 hirurtekoan, batez beste, 4.202 izan ziren, eta 2022-2024 hirurtekoan, berriz, 6.432, neurri handi batean atzerritarren presentzia handiagoa izan delako -mugikortasun handiagoa dutelako nabarmentzen da-.

2025-2045 aldian, guztira, 160.000 barne mugimendu inguru egingo direla aurreikusi da, baina mugimendu horiek ez dute eragin handirik izango lurralde historikoen etorkizuneko bilakaera demografikoan, aldaketak txikiak izango baitira, eta barne migrazioaren ondoriozko galerak txikiak izango baitira Bizkaian eta Gipuzkoan. Arabako barneko migrazio saldoa negatiboa izango da, baina nulutik gertu, barne migrazioaren ondoriozko irteerak ia parekatu egingo direlako sarrerekin.