Eclipse, The Vanjas eta Barriomania izango dira ostegunean Rock Vital Festival jaialdian, Gasteizen

GASTEIZ 14 Jun. (EUROPA PRESS) -

Rock Vital Festival jaialdia ospatuko da Gasteizko Andre Maria Zuriaren plazan ostegunean, ekainaren 15ean, eta Eclipse, The Vanjas eta Barriomania taldeek joko dute. Vital Fundazioak antolatzen du urtero ekimena, Araña del Rock kultura elkartearen eskutik. Kontzertuak 19:00etan hasiko dira, antolatzaileek jakinarazi dutenez.

Eclipse Suediako hard rock melodikoa egiten duen taldea da. Japonian, Australian eta Amerikan jo du, eta bira luzeak egin ditu Europan zehar ere. 'Paradigm' diskoko 'Viva La Victoria' abestia 15 milioi aldiz baino gehiago erreproduzitu da sarean, eta pandemoa ostean ateratako 'Wired' diskoko 'Saturday Night (Hallelujah)' kanta "festa ereserki" bihurtu da jada.

Suediatik helduko da The Vandals laukotea ere. 1950eko eta 1960eko hamarkadetako soul, rhythm and blues eta garaje rock doinuetan inspiratutako taldea da, eta Ike & Tina, Little Richard, Blondie edota The Sonics ekartzen dute gogora. Suedian, Norvegian, Finlandian, Danimarkan, Italian, Espainian, Erresuma Batuan eta Alemanian ibili dira biran, eta kritika oso onak jaso dituzte. Orain atsedenaldia hartu dute, eta Gasteizkoa bezalako noizbehinkako emanaldiak egiteko baino ez dute eteten.

Azkenik, Barriomania talde gasteiztarra ere igoko da oholtzara. Pandemiaren ondoren sortutako taldea da, eta Antik (ahotsa eta gitarra), Brusek (ahotsa), Asier Yarzak (baxua) eta Asier Fernandezek (bateria) osatzen dute. Ibilbide desberdineko lau musikari dira, eta "banda bat osatzeko eta kalitatezko eta nortasun handiko musika eskaintzeko gogoz" elkartu dira. Taldeko kide bakoitzak bere estilo propioa izan arren, bakoitzak duen banako esperientziari esker "collage perfektua" sortu dute.