Gipuzkoako diputatu nagusiak harrera egin die ate irekien eguneko lehen parte hartzaileei

DONOSTIA, 29 (EUROPA PRESS)

Eider Mendoza Gipuzkoako diputatu nagusiak eta Irune Berasaluze Gobernantza diputatuak ongietorria egin diete "gipuzkoar guztion etxera", ostiral honetan foru jauregia ezagutzera joan diren lehen bisitariei, urtero Gabonen bueltan antolatu ohi den ate irekien egunaren baitan.

Jardunaldirako antolatu diren talde guztiak osatu ahal izan dira aurten eta, horrela, egunean zehar banatutako bost txandetako 200 parte hartzaileak batuta, guztira 4.700 pertsona inguruk izan dute 2016an hasi ziren bisita gidatuetan foru jauregia barrutik ezagutzeko aukera.

Halaber, Gipuzkoaren historian eta foru erakundearen bilakaeran murgiltzeko aukera ere ematen zaie bisitariei eta, hain zuzen, ekarpen hori nabarmendu du diputatu nagusiak harreran eskainitako hitzaldian: "Eraikin hau ezagutzearekin batera hobeto ezagutzen dira gure erakundeak, gure lurraldea eta herria bera, eta laguntzen digu jabetzen nola joan den garatzen Gipuzkoa eta Euskal Herri osoa".

Mendozak adierazi duenez, foru jauregia bisitatzeak "begi-bistako interesa" dauka historia, arte edo arkitektura ondarearen ikuspegitik, eraikinak berak eta bertan dauden elementuek balio handia baitute. "Aldundiak bost mende baino gehiagoko historia badu ere, ezagutza mugatua da oraindik bere inguruan", gaineratu du.

Hala, gogorarazi duenez, bisitan ezagutuko diren espazio asko, hala nola tronu aretoa edo kontseilu aretoa, "Gipuzkoaren antolaketa instituzionalaren eta historia politikoaren lekuko dira, gure autogobernuarena, gure ibilbidea markatu duten gertaera eta pertsonena".

"Gipuzkoarrontzat berebiziko garrantzia eduki duten erabakiak eta neurriak onartu dira bertan, eta jarraitzen dira onartzen: aurrekontuak, ekonomia, eta enplegua sustatzeko egitasmoak, ongizate eta zerga politikak, eta abar", adierazi du.

Hori dela eta, Gipuzkoako Foru Aldundiaren ate irekien eguna "jarrera eta estrategia" zabal baten baitan dago. "Foru Aldundiak, lankidetzazko gobernantzaren eskutik, herritarrekin elkarlanean jarduteko eredu bat abiarazi du azken urteotan. Testuinguru horretan, urteko hainbat momentutan foru jauregiko ateak zabaltzen ditugu, foru jauregi honetan ikus daitekeen ondarea historikoa eta kulturala erakutsi eta, baita ere, erakundearen funtzionamendua herritarrei gerturatu asmoz", azaldu du.

BISITA

Erdi arotik aurrerako historia eskultura, tapiz, margolan eta beste elementuekin ezagutu dute bisitariek, gidari espezializatuen eskutik. Ondare artistikoaz gain, Aldundiaren, Batzar Nagusien, horien eskumenen eta antolaketa administratiboaren inguruko azalpenak ere jasotzen dira bisitan, ordubete eta hamabost minutu inguruko ibilaldian.

Nabarmentzekoen artean daude, besteak beste, Gaztelako Alfontso VIII.a irudikatzen duen beiratea, 1.200 urtean foruen zina eginez; Alejandro Iruretaren kupula; Gipuzkoako paisaia eta ohiturak irudikatzen dituen horma dekorazioa; Julio Urquijoren erretratua (Erwal) eta liburutegia, non Aldundiak argitaratutako obra guztiak gordetzen diren.

Halaber, Elkanok munduari egindako itzuliaren omenez egindako tapiza eta getariarrari Zuloagak egindako margolana; Albizuren Lekuona eta Barandiaran margolanak eta Uztapide eta Basarri bertsolarienak; Orixek egindako eskuizkribu zaharrak, edota Elbiria Zipitria euskarazko hezkuntzaren eta ikastolen sustatzaileetako bat izan zen irakaslearen omenez jarritako eskultura bisitatzen dira.