'Hizkuntza harrerarako ardatz batzuk' jardunaldia egingo da ostegunean Bilbon

BILBO 15 (EUROPA PRESS)

Euskaltzaindiak eta Sabino Arana Fundazioak 'Hizkuntza harrerarako ardatz batzuk' jardunaldia antolatu dute Bilbon ostegunerako, abenduaren 18rako, "gurera etorri diren migratzaileak" protagonistak direla.

Topaketak Migratzaileen Nazioarteko Egunarekin bat egingo du eta Sabino Arana Fundazioaren egoitzan izango da, 09:00etatik 14:00etara bitartean, antolatzaileek prentsa ohar bidez jakinarazi dutenez.

Mintegiaren helburua da "migratzaileek hizkuntzari, kulturari eta abarri dagokienez ezezaguna den eremu geografiko eta kultural batean bizitzeko antzeman ohi dituzten aukerak eta zailtasunak jorratzea".

Horrela, Andres Urrutia euskaltzainburuak eta Arantxa Tapia Sabino Arana Fundazioko presidentea jardunaldia ireki ondoren, ikertzaileek, unibertsitateko irakasleek eta migratzaileen hainbat elkartetako ordezkariek parte hartuko dute.

Hain zuzen, parte hartzaileen artean daude Julia Shershneva Ikuspegi Behatokiaren zuzendari eta EHUko irakasle agregatua, Alberto Lopez Basaguren EHUko Konstituzio Zuzenbideko katedraduna, Eduardo Ruiz Vieytez Deustuko Unibertsitateko irakasle eta ikertzailea eta Larraitz Zumeta Ikuspegi Behatokiko ikertzailea.

Era berean, Amelia Barquin Mondragon Unibertsitateko irakasle eta ikertzailea, Nora Palmitano Zestoako euskara teknikaria, Iker Barbero EHUko irakasle agregatua, Celeste Agüero irakasle eta migrazio aholkularia, Mamadou Saar Ndank Ndank Elkarteko arduraduna eta Monica Quiroz Gernika-Lumoko Ideasur Elkarteko presidentea daude partaideen artean.

Azkenik, Sagrario Aleman euskaltzain oso eta Euskaltzaindiaren Sustapen Batzordeko buruak, Xabier Aierdi soziologoak, Patxi Juaristi EHUko irakasle eta euskaltzain urgazleak eta Belen Uranga soziolinguista eta Euskaltzaindiko Sustapen Batzordeko kideak ere parte hartuko dute.