Jaurlaritzak 2,5 milioi euro bideratuko ditu sektore pribatuan euskararen erabilera eta presentzia indartzeko deialdira

GASTEIZ 31 (EUROPA PRESS)

Eusko Jaurlaritzak Lanhitz diru laguntzen deialdia onartu du astearte honetan, Euskal Autonomia Erkidegoko (EAE) sektore pribatuko lantokietan euskararen erabilera eta presentzia areagotzeko helburuarekin. Deialdiak 2.500.000 euroko kontu saila izango da aurten, iaz baino %13,6 gehiago, eta lau motako proiektuak lagunduko dira.

Horrela, Jaurlaritzako arduradunek azaldu dutenez, lehenengo multzoan 250.000 euro banatuko dira entitatean euskara planik izan gabe, euskararen erabilera edota presentzia sustatzeko jarduerak laguntzeko. Gehienez ere, bost urtez jaso ahal izango da diru laguntza multzo honetan.

Bigarren multzoan 200.000 euro izango dira entitatean euskararen egoeraren diagnostikoa egin eta euskara plana diseinatzeko, eta, nahi izanez gero, abian jartzeko ekintza solteak egiteko. Urte bakarrean lagunduko dira multzo honetako jarduerak.

Hirugarren multzoari dagokionez, 1.300.000 euro banatuko dira euskararen erabilera eta presentzia sustatzeko jardueretarako, entitatearen euskara plana eta urteko kudeaketa plana oinarri izanda. Ezin izango dira multzo honetako onuradun izan, Lanhitz diru laguntza 18 urtez jaso dutenak.

Azkenik, laugarren multzoan 750.000 euro erabiliko dira entitateko euskara planak ibilbide luzea izanda edo euskararen kudeaketan maila aurreratuan egonda, euskara planetik harantzagoko hizkuntza proiektu estrategikoak garatzeko.

Diru laguntzotan interesa dutenek hilabeteko epea izango dute eskaerak aurkezteko agindua Euskal Herriko Agintaritzaren Aldizkarian argitaratu eta hurrengo egunetik hasita.