Jaurlaritzak ia 3 milioi euro banatuko ditu euskara ikasleentzako diru laguntzetan

GASTEIZ, 17 (EUROPA PRESS)

Eusko Jaurlaritzako gobernu kontseiluak 2.975.500 euroko aurrekontu saila onartu du astearte honetan 2024-2025eko ikasturtean Euskal Autonomia Erkidegoko (EAE) euskaltegietako ikasleen euskara ikasteko prozesua diruz laguntzeko.

Modu honetan, Jaurlaritzako arduradunek nabarmendu dutenez, jarraipena eman zaio euskara ikasketak doan izateko bidean hartutako konpromisoari, eta diruz lagunduko die HABEren euskararen komunikazio gaitasun mailak egiaztatu dituzten ikasle guztiei, maila guztietan (A1, A2, B1, B2, C1 eta C2).

Diru laguntza jaso ahal izateko beharrezkoa izango da, alde batetik, HABEren erregistroan inskribatutako euskaltegi edo euskararen autoikaskuntzarako zentro homologatu bateko ikastaroren batean matrikulatua egotea 2024ko ekainaren 1etik 2025eko irailaren 30era bitarte eta dagozkion matrikula prezioak euskaltegi edo autoikaskuntzarako zentro homologatuei ordaindu izana, eta, bestetik, maila gainditu edo maila egiaztatu izana.

Eskabidea egiteko bi txanda aurreikusi dira aurten. Lehen txandaren eskari epea ebazpena argitaratu eta biharamunetik abuztuaren 4ra arte izango da, eta eskaera egin ahal izango dute 2024ko uztailaren 1etik 2025eko uztailaren 31 bitartean maila gainditu edota maila egiaztatu duten ikasleek.

Bigarren txandaren eskari epea, aldiz, 2025eko irailaren 1etik azaroaren 3ra arte izango da, eta eskaera egin ahal izango dute 2025eko abuztuaren 1etik urriaren 31ra bitartean maila gainditu edota maila egiaztatu duten ikasleek eta lehen txandan eskaria egiterik izan ez duten pertsonek.

Gainditutako edo egiaztatutako maila bakoitzeko eskari bakarra onartuko da, eta eskabidea egiteko, Eusko Jaurlaritzako egoitza elektronikoan eskuragarri dagoen formularioa bete beharko da.

Bestalde, Jaurlaritzaren arabera, aurtengo deialdian "aurrerapauso garrantzitsua" egin da inklusioaren ikuspegitik, desgaitasunak dituzten pertsonentzako egokitzapen edo salbuespen espezifikoa sartu baita ebazpenean: ebaluazio jakin bat egitea ezinezkoa bada, hala nola idazmena, irakurmenean, mintzamena edo entzumena, ez da beharrezkoa izango adierazpen edo ulermen trebetasun horiek egiaztatzea.

ESLEIPENA

Diru laguntzen esleipen prozedura ez da lehia printzipioaren arabera izapidetuko, baizik eta esleipen jarraituaren arabera, hau da, oinarrietako betekizunak zein baldintzak betetzen dituzten eskabide egile guztiek jasoko dituzte diru laguntzak, aurrekontu saileko zenbatekoa agortu arte.

Gainditu edo egiaztatu den maila bakoitzeko, ikasleak 2023-2024ko eta 2024-2025eko ikasturteetan matrikuletan ordaindutako kopurua eskura dezake, gehieneko muga batzurekin gainditu edo egiaztatutako maila bakoitzeko.

Horrela, gehieneko muga HABEren A1 mailan 600 euro izango da, A2 mailan 800 euro, B1 mailan edo baliokidean 900 euro, B2 mailan edo baliokidean 1.000 euro, C1 mailan edo baliokidean 1995ean edo ondoren jaio diren ikasleentzat 700 euro, C1 mailan edo baliokidean 1994an edo aurretik jaio diren ikasleentzat 150 euro, eta C2 mailan edo baliokidean 100 euro.