'Vitoria-Gasteiz eta bere kontseiluak. Amamengandik bilobengana' liburukia argitaratu dute

GASTEIZ 12 (EUROPA PRESS)

Gasteizko Udalak hiriburuko eta landa eremuko historia eta ondarea ezagutaraztea helburu duen 'Vitoria-Gasteiz eta bere kontseiluak. Amamengandik bilobengana' argitalpena plazaratu du. Memoriaren eta ondarearen bidez historia ezagutaraztea helburu duen turismo eta kultura arloko 'Arabako herriak. Amamengandik bilobengana' dibulgazio proiektuko parte da liburukia.

Gasteizko Udaleko Ekonomia Sustapen, Enplegu, Merkataritza eta Turismoko zinegotzi Maria Nanclares, Arabako Aldundiko Enplegu, Merkataritza, Turismo eta Foru Administrazioko foru diputatu Cristina Gonzalez eta proiektuaren sustatzaileak diren Inma Roiz idazle eta antropologoa eta Itziar Herran turismoan espezializatutako kazetaria izan diar aurkezpenean.

Ekitaldian, era berean, Encarni Armentiaren ahotsa entzuteko aukera izan da; Aranako garai bateko amaetxeko emagina zen eta bere bizipenak liburuan jasota daude.

Bada, agerraldian zehaztu dutenez, 'Vitoria-Gasteiz eta bere kontseiluak. Amamengandik bilobengana' lanak Arabako hiriburuko eta bertako herrietako bilakaera jasotzen du protagonisten, bertan bizi eta lan egin izan dutenen, bidez.

Euskaraz eta gaztelaniaz argitaratutako koaderno-gidak hamarkada batzuk lehenagoko bizitza nolakoa zen erakusten du, izandako aldaketa izugarriak agerian utziz. Egileek amonen eta biloben ahozko testigantzak hartu dituzte iturritzat, baita tokiko kronikarien dokumentazioa ere. Horiei guztiei esker, informazio atsegin, berritzaile eta originala bildu dute Gasteizen eta haren inguruan bizi direnei eta lurraldea bisitatzen dutenei zuzenduta.

Liburukia 'Arabako herriak. Amamengandik bilobengana' izeneko dibulgazio turistiko eta kulturaleko proiektuan sartuta dago. Egitasmoak tokiko memoria lantzen du ahaztuta geratu izan diren ahotsen bidez: amonenak. Gainera, Arabako herrietako ondare material eta ez-materiala ezagutarazten du "ezinbestean" bisitatu beharreko hamar tokirekin.

Argitalpen bakoitza informazio praktikoarekin eta udalerriari buruzko datuekin amaitzen da: kokapen geografikoa, osatzen duten herriak, azalera, biztanleak gaur egun eta iraganean, lurralde hiriburuetarako distantziak eta beste erreferentzia bitxi edota interesgarri batzuk.

Lehen fasean, Añana, Amurrio, Artziniega, Asparrena, Barrundia, Kanpezu, Bastida, Urizaharra, Agurain eta Gaubea udalerrietan oinarritutako aleak argitaratu ziren. Bigarren etapa honetan, Gasteizko koaderno-gidaz gain, Aiarako, Eltziegoko, Laudioko, Maeztuko, Oiongo eta Okondoko historia lantzen duten liburuak argitaratu dituzte sustatzaileek.

Liburuxkak paperean daude argitaratuta, eta 30 orrialde inguru dituzte. Inma Roiz idazle eta antropologoak eta Itziar Herran Euskadiko turismoan espezializatutako kazetariak idatzi dituzte.

AMONEN TESTIGANTZAK

Proiektuaren elementu eta iturri nagusia beren biloben aurrean beren herrietan bizi izandako aurreko mendeko historia kontatzen duten amonen testigantza da. Lekukotasunak "narrazio bizia" dira eta testu literarioetan, argazkigintzako material ugarian eta ikus-entzunezko adierazpenetan aurkezten dira.

Testigantzek irakurleak "harrituta" utziko dituzte eta, aldi berean, beste garai batzuk ekarriko dizkiete gogora. Giden erakargarrietako batzuk dira haien istorioei ikusgarritasuna ematea, eta emakumezkoen ahotsik ez zegoelako isilik geratu den historiaren zati hori lehen pertsonan kontatu ahal izatea.

Koadserno-gidek eta webak Arabako argazkilari bikainen argazkiak ere jasotzen dituzte, hala nola Lopez de Guereñu, Oñate Reynares eta E. Guinearenak. Photo-Arabak eta Gasteizko Udal Artxiboak utzi dituzte, baina amonen familiako albumetatik ateratako argazkiak eta elkarteetan jasotako eta liburuetan azaltzen diren udalerrietako herritarrek hartutako irudiak ere topa daitezke.

arabakoherriak.com webguneak koaderno-gidetan jasotako informazioa zabaldu eta informazio osagarria jasotzen du. Horrela, besteak beste, bioaniztasunari buruzko atala du, Arabako herrien inguruan bizi diren animalien komunitate berezia erakusten duena, bai eta 'kronistak' atala ere, proiektua elikatzen duten tokiko kronistak edo 'oroitzapenaren zaindariak' ikusarazten dituena.

Gasteizko Udalaren, Arabako Foru Aldundiaren eta Oion, Eltziego, Laudio, Aiara, Okondo, Añana, Amurrio, Artziniega, Asparrena, Barrundia, Kanpezu, Urizaharra, Agurain eta Gaubeako udalen laguntza du 'Amamengandik bilobengana' proiektuak.