SANTIAGO DE COMPOSTELA, 29 Jul. (EUROPA PRESS) -

A actividade comercial galega de produtos de alta e media-alta tecnoloxía creceu un 16,9 por cento en 2008 con respecto ao ano anterior, segundo o Consello Económico e Social (CES).

Así reflícteo a 'Memoria sobre a situación económica e social de Galicia 2008' presentada hoxe por este organismo consultivo, que apunta tamén que este incremento supuxo unha mellora do saldo positivo da súa balanza comercial dende os 2.085,8 millóns de euros de 2007 ata os 2.438,4 millóns de euros do ano pasado.

Ademais, indica que o valor total das importacións destes produtos, tras unha redución do 15,9 por cento, ascendeu a 4.754,3 millóns de euros --dende os 5.650,8 millóns de 2007--, o que equivale ao 30,7 por cento do valor total das importacións galegas.

Por a contra, tamén en 2008, as exportacións alcanzaron os 7.192,7 millóns de euros, un sete por cento por debaixo do importe do ano precedente, cando se superaron os 7.736 millóns de euros.

POR SEPARADO

Dos 4.754,3 millóns de euros procedentes das importacións, un total de 588 millóns correspóndense con produtos de alta tecnoloxía. Cabe destacar que esta cifra aumentou dende 2007, cando se alcanzaron 548,3 millóns de euros. Non obstante, no apartado da medio-alta tecnoloxía, a cifra sufriu un descenso dende os 5.102,5 millóns de euros aos 4.166,3 millóns logrados en 2008.

No ámbito das exportacións, a tecnoloxía alta redúcese de 188,3 millóns de euros en 2007 a 138,1 en 2008; mentres que a media-alta alcanza os 7.054,6 millóns de euros o pasado ano fronte aos 7.548,3 do ano precedente.

Os produtos máis importados e exportados no apartado da media-alta tecnoloxía son, maioritariamente, vehículos de motor; mentres que entre os artigos de alta tecnoloxía destaca o material farmacéutico e electrónico.