A CORUÑA, 2 Jul. (EUROPA PRESS) -

Cada usuario galego destinará este ano un total de 638 euros nas adquisicións realizadas a través da rede. Os e-consumidores desta comunidade son os españois que menos diñeiro gastan en comprar por Internet porque na comunidade, o internauta que utiliza habitualmente o comercio electrónico realiza 6,6 compras ao ano.

Os motivos que levan a un a realizar adquisicións a través da rede, son o prezo e a comodidade. Na comunidade a maioría das compras realízanse dende o fogar, o 97 por cento dos usuarios xestionan as súas operacións dende alí, segundo se reflicte no estudio desenvolvido polo Observador Cetelem 2008, 'Hábitos e tendencias do e-consumidor'.

Non obstante, esta máxima só é aplicable a determinados bens ou servizos, xa que no caso de produtos duradeiros o usuario prefire ver e tocar o artigo antes de comprar. Por iso, os produtos máis demandados na rede por os e-consumidores da comunidade son todos os billetes, o aluguer de aloxamentos e o software para os ordenadores. Ademais, Galicia é a comunidade onde máis compras se realizan dende cibercafés e locutorios.

En canto ao medio de pagamento elixido polos internautas galegos para as súas adquisicións online, destaca a tarxeta de crédito. Así, o 39 por cento dos usuarios que compran na rede utilizan o plástico no pagamento dos bens adquiridos. Un once por cento adquire as súas compras mediante transferencia bancaria, un medio de pagamento habitual para os galegos, se se ten en conta que a media española se sitúa tres puntos por debaixo.

Respecto á reticencia de adquirir bens e servizos na rede, o 54 por cento dos consumidores online da comunidade afirma non realizar este tipo de transaccións debido á imposibilidade de poder ver e tocar o produto, fronte a un 34 por cento que afirma que o freo para comprar en Internet é o medo a non poder reclamar en caso de recibir un produto defectuoso.

Mentres que a un 27 por cento non lle gusta dar os seus datos por Internet. O sete por cento dos usuarios galegos manifesta a súa desconfianza na canle, este motivo rexistra a porcentaxe máis alta de toda a península, xa que Internet só crea inseguridade a un catro por cento de españois. Galicia é unha das comunidades onde máis se valora o trato co dependente, un 24 por cento bótao de menos ao comprar por Internet fronte ao 19 por cento da media nacional.

EUROPA.

A análise europea do Observador Cetelem de Internet 2008 está baseada en máis de 10.000 enquisas anónimas realizadas simultaneamente en trece países europeos: Alemaña, Bélxica, Eslovaquia, España, Francia, Hungría, Italia, Polonia, Portugal, Reino Unido, República Checa, Rusia e Serbia. Ademais, a edición española, centrada en máis de 1.600 entrevistas en profundidade.

Internet converteuse na fonte de información "imprescindible" para os europeos. Tal é así que o 17 por cento da poboación europea total utiliza a rede como medio de información antes de realizar a súa compra. Ademais, das nove horas semanais que dedicaban os cidadáns comunitarios a navegar pola rede en 2004 pasaron a destinar 13,5 horas semanais do seu tempo en 2008. Un cincuenta por cento de incremento en catro anos en detrimento de ver televisión, oír a radio ou ler.

O 48 por cento da poboación española ten acceso a Internet e destes, o 45 por cento conéctase a través de banda ancha. Por outra banda, en canto á utilización que fan os galegos de Internet, o 92 por cento dos internautas decántase polo uso do correo electrónico, mentres que para o 90 por cento a rede é unha ferramenta fundamental para buscar información.

Non obstante, un elevado 71 por cento utilízao para ler xornais e outros medios de comunicación online, situándose dous puntos por enriba da media española. Ademais é a rexión onde menos descargas de música e películas se realizan, un cincuenta por cento recoñece que utiliza o seu ordenador para baixarse estes contidos, fronte ao 56 por cento dos españois.