SANTIAGO DE COMPOSTELA 16 Mar. (EUROPA PRESS) -

A Consellería de Innovación e Industria impulsou a convocatoria do programa europeo Matera+, dirixido a facer promoción de accións de investigación e innovación relacionadas coa ciencia e a enxeñaría de materiais. Esta iniciativa financiará a participación de empresas, centros tecnolóxicos e equipos de investigación galegos en proxectos conxuntos entre entidades pertencentes aos países e rexións integrados.

O prazo da primeira fase da convocatoria rematará o próximo 15 de maio e o orzamento dispoñible para os socios galegos nas iniciativas aprobadas por Matera+ é de 500.000 euros, que achegará o departamento que dirixe en funcións Fernando Blanco.

Esta contía poderá ser aumentada coa achega complementaria da Comisión Europea. A asignación global estimada da convocatoria ascende a 22,5 millóns de euros, que cobren na súa maior parte os socios da ERA-NET (16,5 millóns) --redes formadas por axencias de financiamento de distintos países e rexións da UE que coordinan os seus esforzos en temáticas de investigación estratéxicas--, mentres que do resto se encarga o Executivo comunitario.

A primeira fase será de presentación de pre propostas e os axentes deben indicar datos básicos do proxecto, así como entregar unha memoria preliminar. Cada socio rexional --no caso de Galicia, a Consellería--, valorará os traballos da súa rexión e seleccionará ás que presentan.

Esa presentación de propostas realizarase entre o 15 de outubro e o 15 de xaneiro de 2010 para coñecerse en abril dese ano cáles son os proxectos subvencionados. A súa valoración efectuarana avaliadores externos europeos e cada rexión financiará os proxectos seleccionados finalmente dos presentados no seu territorio.

En Matera+, continuación do programa Matera iniciado en 2005, participarán socios de Galicia, Euskadi, Madrid, Bélxica, Finlandia, Islandia, Irlanda, Israel, Italia, Letonia, Luxemburgo, Noruega, Polonia, Suíza, Turquía e Reino Unido.

Preto de 45.000 empresas galegas están relacionadas dalgún modo coa industria dos materiais, o que supón preto do 22 por cento das empresas existentes na comunidade galega e cerca do 30 por cento da poboación activa. Así, sectores como a automoción, construción naval, téxtil ou metal-mecánico ápoianse nos materiais.