AV.- Condenado a 58 anos de prisión o autor confeso do asasinato de dous homosexuais en Vigo

VIGO 14 Oct. (EUROPA PRESS) -

A Sección Quinta da Audiencia Provincial de Pontevedra, con sede en Vigo, condenou a un total de 58 anos de prisión a Jacobo Piñeiro Rial, o autor confeso do dobre crime de dous homosexuais cometido na rúa Oporto de Vigo, por dous delitos de asasinato --penados con 20 anos cada un-- e outro delito de incendio --castigado con 18 anos--. Non obstante, o tribunal aclara que o cumprimento máximo non poderá exceder de 25 anos.

Na sentenza, dada a coñecer este xoves, decídese condenar a Jacobo Piñeiro polos dous asasinatos e o incendio, "sen apreciar circunstancias modificativas da responsabilidade criminal", se ben o absolve dun delito de furto. Ao respecto das indemnizacións en concepto de responsabilidade civil, á nai dun dos falecidos, Marta Pérez Triviño, deberalle aboar un total de 400.000 euros, mentres que á compañía de seguros Santa Lucía, deberalle aboar 9.179,24 euros.

A resolución, ante a que cabe recurso, chega tres semanas despois de que un xurado declarase culpable a Jacobo Piñeiro dos dous asasinatos e o incendio. O tribunal popular xa desestimara os atenuantes esgrimidos durante o xuízo, os cales foron medo insuperable, lexítima defensa e intoxicación. O condenado permanecía en liberdade dende o pasado 13 de xullo, cando lle expirou o prazo máximo de prisión preventiva.

(HABERÁ AMPLIACIÓN)