Centos de persoas protestan en Santiago contra agresións e políticas tránsfobas: "A nosa existencia non é un debate"

1073923.1.260.149.20260329151136

   SANTIAGO DE COMPOSTELA, 29 Mar. (EUROPA PRESS) -

   Centos de persoas mobilizáronse este domingo en Santiago para protestar contra agresións e políticas tránsfobas e reclamar máis dereitos para o colectivo, con especial atención ás persoas non binarias, non migrantes e menores de 12 anos, excluídas da Lei Trans (vixente desde 2023).

   "Os dereitos trans son dereitos humanos. A nosa existencia non é un debate. Non é unha ideoloxía. É unha realidade", reclama o manifesto, lido na Praza do Obradoiro por varias das participantes --xunto a unha intérprete en lingua de signos-- e ao que se adheriron máis de 120 entidades de todo tipo.

   A organización, a cargo da sección xuvenil de Arelas, celebrou unha asistencia "superior á expectivas" e estímana en 1.000 persoas. Representantes desta asociación de familias de menores trans encabezaron a marcha desde a súa saída ás 12.00 horas baixo a lema 'A vosa transfobia, a nosa resposta'. Con ela, quixéronse adiantar dous días ao Día da Visibilidade Trans, que se celebra o 31 de marzo.

   "Hai motivos dabondo para saír ás rúas", defendeu Alicia Arruti, representante de Arelas, ao comezo da protesta. Neste sentido, lamentou ante os medios de comunicación a "terrible" agresión a unha muller trans en La Bañeza (León), pola que detiveron a cinco persoas, e o tamén recente ataque homófobo ocorrido en Pontevedra.

   Igualmente cargou contra o "retroceso" que avista en Portugal, que está en proceso de modificar a súa lei de identidade de xénero para reintroducir o requisito de contar cun informe médico. Ademais, o Goberno do país veciño planea prohibir os bloqueadores hormonais ás persoas menores de 18, que tampouco poderán modificar os seus documentos de identidade.

   Como resposta a estas realidades, as persoas participantes na protesta mostraron o seu rexeitamento con consignas como "O trans é real", "As persoas non binarias existen e resisten" e "Con pene ou con vaxina, mulleres combativas".

   Outros cánticos aludiron directamente ao presidente da Xunta ("Rueda, escoita, ou transfeminismo está en loita"). Precisamente, organizacións políticas da oposición no Parlamento de Galicia, como BNG e PSdeG, participaron na mobilización, do mesmo xeito que representantes de Movemento Sumar Galicia.

   Apoiándose no apoio á manifestación, Arruti remarcou que, aínda que parece que hai "unha maioría en contra, non é así". "O que queremos demostrar é non só defender os dereitos conquistados e reclamar os que quedan por conseguir, senón concienciar e defender que a sociedade galega apoia ás persoas trans", reivindicou.

REIVINDICACIÓNS

   Neste sentido, consideran que o Goberno galego e estatal non están a satisfacer as demandas que reclaman. Entre elas, piden "protección legal efectiva" para o colectivo trans e acceso "digno" á saúde, á educación e ao emprego.

   Tamén esixen formación obrigatoria en identidade de xénero para docentes e persoal sanitario e programas de refuxio para persoas perseguidas nos seus países. Ademais, demandan especificamente á Xunta de Galicia que reforme o protocolo educativo elaborado en relación a este colectivo e que o adapte á actual Lei Trans.

   Respecto diso da normativa estatal de 2023, incidiron na exclusión de varios grupos. Por exemplo, as persoas trans migrantes, que, en moitos casos, "fuxiron de países autoritarios e transfóbicos buscando cambiar de sexo" en España, onde acharon "numerosos impedimentos" burocráticos, en palabras de Arruti.

   Esta é unha situación que achan similar á que viven as infancias trans menores de 12 anos, ás que a lei deixa nunha "lagoa legal", e ás persoas non binarias, con dificultades para acceder ao cambio de nome ou a tratamentos médicos. O manifesto reclamou a súa inclusión na normativa como "un gran paso" para alcanzar o "recoñecemento" da súa existencia.