Centros públicos denuncian que non recibiron ningún portátil do plan Abalar e critican o "baleiro de información"

SANTIAGO DE COMPOSTELA, 6 Oct. (EUROPA PRESS) -

Os centros públicos galegos "aínda "non recibiron" ningún ordenador como parte do proxecto Abalar, segundo aseguraron en declaracións a Europa Press fontes da Federación Galega de Centros Públicos.

"Non hai ningunha entrega", lamentan as mesmas fontes. En concreto, a Federación celebrou este mércores unha reunión na que abordaron a situación da dotación de ordenadores do plan Abalar. Durante o devandito encontro, os centros negaron "recibir" algún equipo dos que estaba previsto a súa entrega a partir desta xornada.

Fontes da Consellería de Educación explicaron, pola súa banda, que os equipos informáticos "están a chegar" á Xunta e comezarán a repartirse "cando estean os centros preparados", aínda que é posible que "algún centro" os reciba durante o día.

Ante esta situación, a Federación de centros públicos critica "o baleiro de información" dende a Xunta e planea poñerse en contacto co Executivo galego para "transmitirlle o seu malestar" ao respecto. "Soamente nos informan por medio da prensa", lamentan.

Así mesmo, consideran que os centros públicos están "en inferioridade de condicións respecto á concertada" no marco do proxecto Abalar, ao tratarse "dunha minoría" de beneficiarios de titularidade pública en contraposición cos da concertada e a privada.

Nesta liña, o presidente da Confederación Galega de ANPAs de Centros Públicos, Virgilio Gantes, criticou o maior peso deste tipo de centros respecto aos públicos e asegurou non ter "nin idea" de como transcorre a dotación de ordenadores.

EXPERIENCIA PILOTO

Á súa vez, fontes do ensino privado e concertado negaban a recepción por parte dos centros dalgún ordenador do proxecto Abalar e aclaran que "o calendario vai para longo".

Segundo explican, a Xunta iniciará unha experiencia piloto "nuns "12 centros" de titularidade pública, privada e concertada aos que se dotará duns "50 portátiles" --en total, uns 600, aproximadamente--.

O obxectivo, afirman as mesmas fontes, será a de implantar unha primeira experiencia "o máis ampla posible" e "en diferentes ámbitos", como as "grandes cidades", o rural e ver o seu funcionamento en "diferentes velocidades de conexión".

Dese modo, preténdese evitar os "problemas" que se rexistraron noutras Comunidades Autónomas nas que a implantación "se fixo máis á présa", aseguran. En concreto, afondarase na formación de coordinadores --un por centro-- para, nunha segunda fase, instruír o profesorado. "En tres meses, todo funcionando", conclúen.

Un dos centros que forman parte desta primeira experiencia piloto será o Santiago Apóstol de Ponteareas, cuxa responsable, Pilar Domingo, sinalaba a Europa Press que "aínda non" recibiron os ordenadores, pero que se atopan na fase "de formación".

ATRASO

Despois de que a Consellería de Educación multe a empresa contratada por non cumprir o prazo previsto, que venceu o 20 de setembro, a recepción de ordenadores do plan Abalar estaba prevista este mércores.

O departamento que dirixe Jesús Vázquez penalizou a empresa con 922 euros por día de atraso na repartición dos ordenadores, o que superará os 10.000 euros de multa cando empece a distribuír estes equipos entre os centros escolares galegos. Polo seu lado, a empresa xustificara a tardanza en dificultades para a fabricación e abastecemento.