A costa da Coruña e Lugo estará en alerta laranxa este luns por ondas de até 6 metros

    A CORUÑA, 15 Mar. (EUROPA PRESS) -

   A Xunta de Galicia activou para este luns a alerta laranxa por temporal costeiro no litoral noroeste e oeste (Costa da Morte) da provincia da Coruña e na Mariña lucense. Debido aos avisos de ondas de até 6 metros de altura, tamén decidiu suspender a actividade deportiva no mar.

   As alertas emitidas pola Axencia Estatal de Meteoroloxía (Aemet) empezarán ás 11.00 horas da mañá e terminarán ás 20.00 en Lugo e Costa da Morte e ás 21.00 no noroeste coruñés, cando baixarán ao nivel amarelo. O organismo advirte de mar combinada do noroeste con ondas de entre 5 e 6 metros.

   Nestes casos, a Secretaría Xeral para o Deporte da Consellería de Presidencia, Xustiza e Deportes anunciou a suspensión da actividade deportiva no mar, tanto a federada como a do programa Xogade. Os concellos afectados poden consultarse na web 'Deporte Galego'.

   Ademais, a Xunta lembra a importancia de manterse afastado da liña de costa, é dicir, diques, rompientes e paseos marítimos. Tamén pide que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.

    Ao mesmo tempo, desde primeira hora da mañá, o resto do litoral galego (suroeste coruñés e costa de Pontevedra) estará en alerta amarela por mar combinada do noroeste que deixará ondas de entre 4 e 5 metros. Aquí non se aplicarán restricións.

CHEGADA DO BO TEMPO: LUNS SEN CHOIVAS

   Este temporal costeiro coincidirá coa chegada da estabilidade metereológica. A previsión de Meteogalicia recolle que Galicia quedará na influencia das altas presións e vivirá unha xornada sen choivas, con néboas matinais localmente persistentes e ceos despexados pola tarde.

   As temperaturas mínimas descenderán lixeiramente e as máximas ascenderán notablemente. Nas cidades, moverase entre os 16 ºC (na Coruña) e os 24 ºC (en Ourense). Ademais, o vento soprará frouxo de dirección variable con predominio de compoñente leste.