O profesorado galego de Secundaria impartirá desde setembro dúas horas menos de clase

   SANTIAGO DE COMPOSTELA, 24 Abr. (EUROPA PRESS) -

   O conselleiro de Educación, Ciencia, Universidades e FP, Román Rodríguez, chegou a un acordo cos sindicatos --CC.OO, UXT, ANPE e CSIF-- para a redución horaria do profesorado de Secundaria, o impulso dun plan para o alumnado con necesidades especiais e a baixada de cocientes en Secundaria e Bacharelato.

   Así o anunciou este venres nunha rolda de prensa celebrada na Cidade da Cultura na que estiveron presentes todos os sindicatos, menos a CIG --maioritario na mesa sectorial--.

    En concreto, o acordo recolle que o horario do profesorado de Secundaria pasará de 20 a 18 horas lectivas. As dúas horas de permanencia no centro serán para accións orientadas a "mellorar a calidade dos servizos". Así mesmo, acordaron novas medidas de apoio aos titores e aos equipos directivos.

    O documento tamén pon o foco na diversidade, polo que realizarán un plan que "supoña un impulso" ás necesidades educativas especiais. Desta forma, modificarán os catálogos de persoal en etapas de Infantil e Primaria e ampliará o persoal especialista e os orientadores nos cursos de Secundaria.

    En canto aos cocientes, acelerarán o calendario previsto, no acordo de 2023, para a etapa de Secundaria. Desta forma, adiantarán a 2028 a redución de 30 a 25 alumnos por aula na ESO --unha medida prevista inicialmente para 2033-- e, ademais, en Bacharelato pasarán de 33 a 30 alumnos por aula.

    O conselleiro explicou que as propostas serán elevadas aos órganos pertinentes coa previsión de empezar a aplicalas desde o próximo curso, que empeza en setembro.

"O DIÁLOGO FUNCIONA"

   A continuación, o conselleiro remarcou que estas medidas "de gran calado" xorden do proceso de diálogo, entre sindicatos e Administración, que "funciona e ten bos resultados".

    Neste contexto, agradeceu ás organizacións sindicais presente a súa "responsabilidade e altura de miras" por "ser capaces de ceder nalgúns aspectos" ao longo do proceso, nos que a Administración tamén tivo que "ceder".

    "Cando traballamos conxuntamente, cando temos altura de miras, cando pensamos que o noso traballo ten que beneficiar ao que máis importa, que son os alumnos, somos capaces de expor acordos estratéxicos e históricos como este, que é o segundo paso dentro deste proceso que xurdiu en 2023", resolveu o conselleiro.

REPRESENTANTES DOS SINDICATOS

   Pola súa banda, representantes dos sindicatos presentes valoraron "moi positivamente" o acordo alcanzado e remarcaron que "traballarán para seguir mellorando".

   Neste sentido, CC.OO. puntualizou sobre "dous avances moi importantes" no acordo, que son o reforzo da acción editorial e da función directiva.

    En canto á atención á diversidade, ANPE subliñou con estas medidas faise un reforzo "estable e estrutural" que responden a unha "necesidade crecente" e é unha demanda que as familias e as comunidades educativas trasladaban "de maneira continua".

    Así mesmo, o sindicato UXT puntualizou que a xornada dos docentes seguirá sendo de 37'5 horas e resaltou "dous avances importantes" que son o reforzo da acción editorial e da función directiva.