Santiago impulsa un recurso para acoller temporalmente a persoas migrantes en situación de emerxencia habitacional

   SANTIAGO DE COMPOSTELA, 15 Oct. (EUROPA PRESS) -

   O Concello de Santiago asinou este xoves un convenio coa Escola de Tempo Libre Don Bosco que está dotado cun total de 30.000 euros e permite contribuír a impulsar un recurso de acollida temporal destinado a persoas migrantes, ademais de dar continuidade a outra iniciativa dirixida a mozas en risco de exclusión social.

   Este recurso, xestionado por Don Bosco en colaboración coa Rede Veciñal de Apoio ás Persoas Migrantes, consiste nun piso xa en funcionamento que garante a persoas destas colectivo estancias medias de 15 días, que se poden prorrogar en caso de ser necesario. Teñen prioridade de acceso as persoas en situación administrativa irregular e aquelas que presentan problemas de saúde.

   A concelleira de Dereitos e Servizos Sociais, María Rozas, presentouno en rolda de prensa xunto a Xesús María Vilas, en representación de Don Bosco, e de Isabel Varela e Javier Arregui, como parte da Rede Veciñal. Na súa intervención, Rozas apelou ao "racismo inmobiliario" e ao "drama social do acceso á vivenda, que afecta de forma máis rotunda aos colectivos vulnerables".

    O piso empezou a funcionar en xuño deste ano e contou desde o seu inicio cunha ocupación do 100%, segundo constata Varela. Até agora, acumula un total de 726 pasas a noite. "A iniciativa é que teñan 15 días para buscar un traballo e unha casa ou, se xa teñen traballo, buscar unha casa", explica.

   A maioría de usuarios proceden de Mali, aínda que tamén foron acollidas persoas de Mauritania, Senegal, Gambia, Guinea e Alxeria. Os que saíron foron capaces de "arrincar a súa vida, atopar traballo ou conseguir unha vivenda"; nalgúns casos, algúns mesmo foron derivados a pisos de xente que forma parte da Rede Veciñal. "Este encontro é unha cousa positiva tanto para as persoas que chegan como para as que estamos aquí. Como a nós non nos pasa, non sabemos o racismo descarnado que existe", completa Javier Arregui.