Voluntariado, cultura, formación e apoio a maiores durante o confinamento na web 'Afundación en casa'

SANTIAGO DE COMPOSTELA 26 Mar. (EUROPA PRESS) -

Abanca e a súa obra social presentaron este xoves o seu portal web 'Afundación en casa', que porá a disposición da cidadanía desde os seus domicilios proxectos culturais, de formación, de voluntariado e apoio a maiores durante esta etapa de confinamento pola epidemia de COVID-19.

Ao longo da semana pasada, Abanca e Afundación estiveron a traballar para, mediante "o uso da tecnoloxía máis avanzada", poder ofrecer propostas que repliquen os contidos habituais das súas áreas estratéxicas neste momento. Isto materializouse na creación desta plataforma interactiva e dinámica na que conviven os contidos en directo, as novas propostas e o fondo vivo e actualizable de Afundación.

O portal inclúe, ademais, unha sección de acompañamento. Deste xeito, froito da colaboración entre as áreas de Envellecemento Activo e Voluntariado, creouse a plataforma '+ 60, acompañámoste', conformada por unha rede de voluntarios para axudar, acompañar e manter informados, vía telefónica, aos socios dos Espazos +60.

Ademais, con este mesmo obxectivo de acompañamento, no espazo 'Escoitámoste' a entidade estará en contacto permanente cos usuarios, a través de persoas voluntarias, para proporcionar información e asesoramento sobre as posibilidades de 'Afundación en casa'.

Do mesmo xeito, Abanca e Ieside están a traballar conxuntamente para pór en marcha 'Abanca e Ieside asesoran', co obxectivo de proporcionar información ás pemes, os autónomos e a quen, desde o ámbito da actividade que desenvolven, teñan dúbidas sobre as medidas ou os recursos ao seu alcance ante a situación actual en materia sociolaboral e económica.

NOVOS CONTIDOS

En 'Educación en casa' presentaranse, entre outras, novas conferencias do ciclo Educación Século XXI, que poderán seguirse en directo ou acceder a elas posteriormente no propio portal.

Estes novos contidos, explicou Afundación, ofrecen claves e abordan temas útiles na actual situación como a seguridade no uso da rede e as novas tecnoloxías en menores, o control do estrés ou a realización de mindfulness en familia, entre outras.

Así mesmo, está a traballarse na realización de talleres de ciencia, de arte ou de cociña, que se emitirán en directo para que as familias poidan seguilos e levalos a cabo desde as súas casas. Ademais, toda a comunidade educativa, desde docentes até nais, pais e titores, poderá acceder a recursos didácticos cos que traballar cos máis pequenos desde casa, como guías sobre as exposicións ou sobre obras de teatro.

En canto á Educación Superior, Afundación está a traballar para ofrecer online, por parte de docentes de prestixio, contidos diversos de interese xeral que amplíen os coñecementos da cidadanía durante este período. A primeira cita será co xeoestratega Pedro Baños, relator do Master Internacional de Ieside, quen falará en directo no portal sobre 'Así se domina o mundo. Claves xeopolíticas do poder ante o COVID-19'.

Tamén estarán dispoñibles os recursos de Ieside como masterclass, conferencias ou foros, así como o acceso a unha biblioteca online onde se poderá atopar un gran número de publicacións dixitalizadas dos ámbitos económico e financeiro, esencialmente.

CULTURA E MAIORES

Na área de 'Cultura en casa' poderase gozar en directo de recitais de poesía, concertos, contacontos, conferencias e charlas de expertos en arte analizando diferentes obras da Colección de Arte Afundación. Tamén se atopan nesta sección as visitas virtuais aos proxectos expositivos de Afundación.

Pola súa banda, en '+ 60 en casa', ademais da área de acompañamento, poranse a disposición deste colectivo tutoriales e outras ferramentas útiles para este período de corentena relacionados coas novas tecnoloxías, talleres culturais ou exercicio en casa.