A Xunta lamenta que a "actitude cambiante" do alcalde da Coruña sobre a terceira ronda "arrisque" a infraestrutura

XUNTA

SANTIAGO DE COMPOSTELA 17 Ago. (EUROPA PRESS) -

O conselleiro de Medio Ambiente, Territorio e Infraestruturas, Agustín Hernández, lamentou que a "actitude cambiante" do alcalde da Coruña, Javier Losada, "arrisque" a construción da terceira ronda, unha infraestrutura que cualifica de "vital" para a cidade.

Segundo Agustín Hernández, as afirmacións do alcalde coruñés resultan "contraditorias", e se "é certo" que "desexa que se inicien xa" as obras, non se explica que cada día "adopte unha actitude distinta".

Ademais, o conselleiro recordou, nun comunicado, que nunha carta que lle enviou Javier Losada este "se comprometeu" a levar a cabo as expropiacións unha vez que o departamento autonómico "aprobase" o proxecto construtivo do novo vial, ante o que Hernández asegurou que a Xunta xa cumpriu con "rigorosidade" as súas responsabilidades ao aprobar a modificación do enlace das Rañas.

Este novo borrador do convenio para a construción do enlace das Rañas implicou un "sobrecoste" de dous millóns de euros, o que conforme indicou Hernández, eleva o orzamento do enlace a 18 millóns que serán achegados pola Administración galega.

Ante esta situación, o conselleiro solicitou ao Concello da Coruña "transparencia e lealdade" para avanzar na actuación, e animou o alcalde a "tomar exemplo" do esforzo que está a realizar a Xunta de Galicia.